Bu gün saat 19:30-da Bakı Olimpiya Stadionunun mətbuat konfransı zalında həvəskar futbolçular arasında peşəkar səviyyədə keçiriləcək Mini Futbol Liqasının (MFL) təqdimatı baş tutacaq. Sportnet.az-ın məlumatına görə, "Sport Marketing Group"un təşkil edəcəyi liqanın təqdimatını keçirməkdə məqsəd təşkilatçılarla iştirakçıların interaktiv görüşünü reallaşdırmaq, MFL və ümumiyyətlə Liqa haqqında hər kəsi daha ətraflı məlumatlandırmaq, eyni zamanda iştirakçılara qaranlıq qalan məqamları açaraq onların suallarını cavablandırmaqdan ibarətdir.
Həvəskar futbolçular arasında "Avro-2016” və "San Marino” kuboklarına imza atan MFL şirkəti bu dəfə birillik tamhəcmli mini futbol liqasına start verir. Qalib komandanın 10 min manat qazanacağı, iştirakçıların liqa müddətində xarici komandalarla yoldaşlıq görüşləri keçirəcəyi çempionat sentyabrın 26-da başlayacaq və 2017-ci ilin iyunun 17-də yekunlaşacaq.
Liqada iştirak üçün komandalar 1000 AZN, korporativ komandalar isə 2000 AZN rüsum ödəməlidirlər. MFL-in təşkilatçısı "Sport Marketing Group” və MFL şirkətidir. MFL çempionatına ev sahibliyini isə "Sportster” kompleksi edir.
Qeyd edək ki, MFL Liqasının rəsmi dəstəkçisi AFFA-dır.
Qeydiyyat və ətraflı məlumat üçün: (+994) 055 263 73 12, info@sportmarketing.az
