"Matça çox böyük itkilərlə çıxmışdıq. Əsas heyətin 5 futbolçusu müxtəlif səbəblərdən kənarda qalmışdı. Ona görə də əvəzedici heyətdən eyni sayda gənc oyunçunu əsas komandaya cəlb etmiş, onlara belə imkanı yaratmışdıq".
Sportnet.az xəbər verir ki, bunu "Kəpəz"in baş məşqçisi Şahin Diniyev "Sumqayıt"la evdə 0:0 hesablı heç-heçə etdikləri Azərbaycan Premyer Liqasının XI tur matçından sonra CBC Sport-a açıqlamasında deyib.
Oyunlarını tapa bilmədiklərini deyən 50 yaşlı mütəxəssisin fikrincə, heyəti onsuz da kasad olan "Kəpəz"dən 5 futbolçunun oynamaması komanda üçün problemdir: "Azlıqda qaldıqdan sonra müdafiəni düşünməyə çalışdıq. Qazanılan bir xal da bizim üçün yaxşı nəticədir. Sadəcə, irəli baxmalıyıq. Zədəlilərimiz sağaldıqdan sonra öz oyunumuzu göstərə biləcəyik və qələbələr də gələcək. Noyabrın 19-da "Qarabağ"la keçirəcəyimiz növbəti tur matçında Kərim Diniyevdən başqa bütün futbolçuları görə biləcəyik".
