Azərbaycan Premyer Liqasında məğlubedilməz tək komanda qalıb. Sportnet.az-ın məlumatına görə, bu, yalnız "Qəbələ"dir.
Roman Qriqorçukun komandası kimi məğlubiyyətsiz irəliləyən "İnter" ilk dəfə olaraq XI turda "Neftçi"yə səfərdə uduzub - 0:2.
Maraqlıdır ki, Zaur Svanadzenin komandası çempionatda sonuncu məğlubiyyətini də məhz həmşəhərlilərindən onun meydanında alıb. Sadəcə, keçən mövsümün XXXIV turundakı həmin 2:4 hesablı məğlubiyyət "Bakcell Arena"da yox, rəqiblərini o vaxt qəbul etdiyi "Əlincə Arena"da olub. Həmin oyun mayın 15-də keçirilib və "İnter" 174 gün sonra Premyer Liqada meydanı məğlub tərk edib.
Bu, "Neftçi"nin cari çempionatda 3-cü, hazırkı baş məşqçisi Elxan Abdullayevin rəhbərliyi altında 2-ci qələbəsi olub. "Ağ-qaralar” cari çempionatın startında AZAL-ı səfərdə 2:0 hesabı ilə məğlub etmişdilər ki, onda baş məşqçi Vəli Qasımov idi. Abdullayevin rəhbərliyi altında qazanılan yeganə qələbə isə VII turda oktyabrın 1-də evdə "Kəpəz” üzərində 2:0 hesabı ilə olmuşdu. Göründüyü kimi, "Neftçi” 35 gündən sonra meydanı qalib tərk edib.
