"Kəpəz” futbol klubunun baş məşqçisi Şahin Diniyevin Sportnet.az-a müsahibəsi
- İntizam Komitəsi XX tur çərçivəsində "Qəbələ” ilə matçda rəqib futbolçunu vurduğu üçün qırmızı vərəqə alan Nicat Qurbanovu 4 oyunluq cəzalandırıb, 3200 manat cərimə kəsdi. Klub tərəfindən oyunçuya əlavə cəza tətbiq olunacaq?
- Əsas məqsəd sakitlik yaratmaqdır. Qurbanovun həm özü, həm də komanda üçün pis oldu. Yenicə forma yığırdı, indi 4 oyun kənarda qalacaq. Bu, onun üçün çempionatın bilməsi deməkdir. Çünki bir ay meydana çıxmayandan sonra heyətə düşmək çətindir. Yəqin ki, biz tərəfdən pul cəzası olacaq.
- Gəncədəki oyunun fasiləsində baş verənlərlə əlaqədar "Qəbələ” klubuna ağır cəzalar və 38400 manat cərimə kəsildi. Dəhlizdə yaşananların "Kəpəz”ə aiddiyatı var? Yəni, siz tərəfdən şikayət edən olub?
- "Kəpəz”in bu hadisə ilə heç bir əlaqəsi yoxdur. Orda nə baş verdiyini görməmişik. Birinci komandalar, sonra hakimlər meydana çıxır. Nə olubsa, həmin vaxt baş verib.
- "Kəpəz” səfərdə matçları ilə müqayisədə ev oyunlarda yaxşı nəticələr əldə etdir. Bu, rəqiblərin normal vəziyyətdə olmayan Gəncə şəhər stadionunun durumu ilə bağlıdır, yoxsa azarkeş dəstəyi kömək olur?
- Azarkeşlərin böyük rolu var, bunu danmaq Allahsızlıq olardı. Ancaq səfərdə zəif oynadığımızla razı deyiləm. Məsələn, AZAL ilə evdə heç-heçə etdik, amma Bakıda udduq. Sadəcə olaraq, komanda qara zolaqda idi və həmin görüşlər də səfər qarşılaşmalarına təsadüf etdi. Gəncədə də oynasaydıq, eyni şey olacaqdı.
- "Kəpəz” növbəti turda AZAL-ı qəbul edəcək. İlk dövrədə Gəncədə baş tutan matçda qapılara qol vurulmadı. Səfərdə isə 1:0 hesabı ilə qalib gəldiniz...
- Təəssüf ki, AZAL yaxşı heyət gec yığdı. Komanda çox yaxşı futbol sərgiləyir, asanlıqla məğlub olmurlar. Ötən tur "Neftçi”yə qarşı da inamlı çıxış etdilər. Vaqif Cavadov epizodların birində qapıya dəqiq zərbə vura bilsəydi, hesab fərqli olardı. İnandırım sizi, AZAL ilə oyunumuz "Qəbələ” və "Qarabağ”la müqayisədə daha çətin keçəcək. Döyüşkən və qapalı futbol sərgiləyirlər. Artıq yaradıcı futbolçuları da var. Heyət baxımından bizdən güclü görünürlər.
