Vaqif Cavadov AZAL-da qol hesabını açıb. Sportnet.az-ın məlumatına görə, 28 yaşlı hücumçu buna yeni klubunda 3-cü oyununda nail olub.
Maraqlıdır ki, Vaqif Premyer Liqada sonuncu qolunu qış fasiləsinədək şərəfini qoruduğu "Sumqayıt”da məhz "Kəpəz”ə vurub və həmin oyun da 1:1 hesabı ilə nəticələnib. Sadəcə, V turda sentyabrın 18-də, 170 gün öncə keçirilən həmin matçda Cavadovun komandası meydan sahibi olub. Onda hücumçu ikinci hissədə hesabı açmışdısa, bu dəfə Gəncədə son dəqiqələrdə vurduğu qolla komandasını məğlubiyyətdən xilas edərək qış fasiləsindən sonra ilk xalı qazandırıb.
Əsas məqamlardan biri ondadır ki, bu, Vaqifin milli çempionatda yubiley – 50-ci qolu olub. Futbolçu ötən turda Premyer Liqada digər yubileyini – 200-cü matçını qeyd etmişdi. Cavadov bu qədər artıq 6-cı klubunda vurur. Təbii ki, o, ən çox karyerasında ən uğurlu komanda, 2 müxtəlif vaxtda şərəfini qoruduğu "Qarabağ”da fərqlənib – 99 oyun, 21 qol.
Göründüyü kimi, Ağdam klubunda 100-cü oyununu qeyd etməyin bir addımlığında olan futbolçu matçlarının demək olar yarısını burada keçirib. O, paytaxt təmsilçiləri - "Bakı” (23 oyun, 4 qol) və "İnter”də (33 oyun, 14 qol) hərəyə 1 mövsüm oynayıb. Yeri gəlmişkən, Vaqif 1 mövsümdə ən çox qola "İnter”də imza atıb. O, "Sumqayıt”da oynadığı son ilyarımda 29 oyunda 6 dəfə fərqlənib.
Cavadov 2006/07 mövsümündən bu yana Azərbaycan Premyer Liqasında yalnız 2014/15 mövsümündə iştirak etməyib. Həmin mövsüm Türkiyə çempionatının I liqasında top qovan Vaqif milli çempionatda hər mövsümdə qol hesabını aça bilib. O, klublarımızdan yalnız yarım mövsüm şərəfini qoruduğu, ən az oyun keçirdiyi (3) "Qəbələ” qol vura bilməyib.
Mehman SÜLEYMANOV
