"Milli komandanın heyətində ilk qolumu vurdum və buna görə çox sevinirəm".
Sportnet.az-ın məlumatına görə, bunu Azərbaycan millisinin futbolçusu Tərlan Quliyev Qətəri səfərdə 2:1 hesabı ilə yendikləri yoldaşlıq görüşündən sonra affa.az-a açıqlamasında deyib.
O bildirib ki, komandasının qələbəsi daha vacib olub. Quliyevin fikrincə, bu qələbə Almaniya yığması ilə oyuna yaxşı motivasiya olmalarına kömək edəcək: "Meydanda əzmkarlıq nümayiş etdirdik. Bu qələbənin ardını gətirmək lazımdır. Birinci hissədə hər iki komanda kəşfiyyat xarakterli oyuna üstünlük verdi. Fasilədən sonra biz hesabı açdıq və sanki rəqib ayıldı, hücumlar qurmağa başladı. Bu da normal haldır, çünki Qətər yığması ev sahibidir. Əsas qələbə qazanmaq, Almaniya millisi ilə oyuna yüksək əhval-ruhiyyədə yollanmaq idi, biz də bunu bacardıq”.
Qeyd edək ki, Tərlan Quliyev Qətərlə oyunda ilk qolun müəllifi olub.
