"Rəqibin oyunlarını izləmişdik. Nəyə qadir olduqlarını bilirdik. Texniki futbola üstünlük verən komanda idi. Səfərdəki qarşılaşmanın çətin keçəcəyini bilirdik. Elə də oldu. Yaratdığımız imkanlardan istifadə edib qələbə qazanmağı bacardıq".
Sportnet.az-ın məlumatına görə, bunu Azərbaycan millisinin futbolçusu Cavid Hüseynov Qətər yığmasını səfərdə 2:1 hesabı ilə yendikləri yoldaşlıq görüşü barədə danışarkən deyib. 29 yaşlı yarımmüdafiəçi öz oyunu barədə danışmaq istəməyib: "Bu haqda nəsə deməyim düzgün olmaz. Yaxşı olar ki, bu barədə mütəxəssislər fikir bildirsinlər. Komandaya yeni cəlb olunan gənc futbolçular da özlərini yaxşı tərəfdən göstərməyə çalışdılar".
Hüseynov Almaniya ilə oyunda nəticə qazanmaq istədiklərini bildirib: "İndi bizi Almaniya ilə çətin oyun gözləyir. Əlbəttə, əlimizi-qolumuzu sallamaq fikrimiz yoxdur. Rəqibin adından asılı olmayaraq, nəticə qazanmaq istəyirik”.
