İngiltərə Çempionşipində mübarizə aparan "Derbi Kaunti" klubu baş məşqçi Stiv Maklarenlə yollarını ayırıb.
Sportnet.az-ın klubun rəsmi saytına istinadən məlumatına görə, İngiltərə millisinin sabiq baş məşqçisi ilə yanaşı, onun köməkçiləri də vəzifələrindən ayrılıb.
Maklaren bu komandadan ikinci dəfə qovulub. O, ilk dəfə 2013 - 2015-ci illərdə "Derbi Kaunti"də çalışıb. Bu dəfə isə 55 yaşlı mütəxəssisin 2016-cı ilin oktyabrından işlədiyi komandada fəaliyyəti yarım il çəkməyib. 35 turdan sonra "Derbi Kaunti" turnir cədvəlində 10-cu pillədə qərarlaşıb.
Qeyd edək ki, Stiv Maklaren Azərbaycan millisinin sabiq baş məşqçisi Vaqif Cavadovun Hollandiya "Tvente"sində baş məşqçisi olub. Cavadov 2009-2010 mövsümünün ikinci yarısında yollandığı komandada oynamadan çempionluq qazanıb. Cavadov hazırda Azərbaycan Premyer Liqasının autsayderi AZAL-da forma geyinir.
