"Neftçi" futbol klubunun sabiq prezidenti Sadıq Sadıqov 80 illik yubiley tədbirinə qatıla bilməməsinin səbəbini açıqlayıb.
Hazırda Azərbaycan Cüdo Federasiyasının vitse-prezidenti vəzifəsində çalışan S.Sadıqov Sportnet.az-a açıqlamasında bunu Gürcüstanda işgüzar səfərdə olması ilə əlaqələndirib: "Mən martın 28-dən Qran Pri turniri ilə əlaqədar Tbilisidə olan Azərbaycan yığmasının yanındayam. Dəvətnamə isə federasiyamızın ofisinə martın 29-da gəlib. Buna görə də tədbirə qatıla bilməmişəm. Həmin vaxt Bakıda olsaydım, iştirak edərdim".
Keçmiş klub rəhbəri "Neftçi"də ardıcıl 3 çempionluq və Avropa Liqasının qrup mərhələsinə vəsiqə kimi nailiyyəti Azərbaycan idmanı naminə əldə etdiklərini də vurğulayıb. O, hazırda əsas diqqəti cüdoya yönəltdiyini bildirib: "Komandamız Qran Pridən sonra Antalya Qran Prisinə, oradan Polşadakı Avropa çempionatına, daha sonra Bakıda keçiriləcək İslam Həmrəyliyi Oyunlarına qatılacaq. Hazırda İslamiadaya qızğın hazırlıq gedir. Açığı, futbolu düşünməyə vaxt da yoxdur".
Qeyd edək ki, "Neftçi"nin yubiley tədbirində 2012-ci ildə Avropa Liqasında təmsil olunmuş heyətdən yalnız baş məşqçi Böyükağa Hacıyev iştirak edib. Keçmiş vitse-prezident Tahir Süleymanov və klubun digər əməkdaşlarına dəvət göndərilməyib.
