Bakı "İnter”nin Avropa Liqasının I təsnifat mərhələsində Sebiyanın "Mladost” u ilə səfər matçından dərhal vətənə dönməməsinin səbəbi müəyyənləşib.
Klubun mətbuat xidmətindən verilən məlumata görə, buna səbəb geriyə uyğun reysin olmamasıdır. Bu səbəbdən "İnter” bir gün yubanıb və bu gün səhər Luçanidə bərpa məşqinə çıxıb.
Paytaxt təmsilçisinin kollektivi bu gün avtobusla Belqrada, oradan isə Belqrad-İstanbul-Bakı reysi ilə vətənə qayıdacaq. "Ağ-göylər” Bakıya sabah saat 05:20-də çatacaqlar.
Qeyd edək ki, "İnter” səfərdə "Mladost”u 3:0 hesabı ilə məğlub edib. Bu kollektivlər arasında cavab görüşü iyulun 6-da keçiriləcək.
