Çempionlar Liqasının III təsnifat mərhələsinin ilk matçları çərçivəsində keçiriləcək "Qarabağ” – "Şerif” qarşılaşmasının biletləri sabahdan etibarən satışa çıxarılacaq.
Sportnet.az-ın məlumatına görə, qarşılaşmaya böyük marağı nəzərə alan "Qarabağ” azarkeşlərimizin qısa zaman kəsiyində asanlıqla biletlərini əldə etməsini düşünərək daha bir ilkə imza atıb. Rəqib dünən məlum olduğundan, sözügedən matçın cəmi 5 gün sonra keçiriləcəyini nəzərə alan Ağdam təmsilçisi önləyici tədbirlər görüb. "Şerif”lə matçın biletlərinin üzərində rəqib komandanın adı və loqosu yer almayıb. Bunun da əsas səbəbi bilet satışının daha erkən başlanması və azarkeşlərimizin çətinliklərlə üzləşmədən biletləri əldə etməsinə şərait yaratmaq olub.
Bu təcrübədən Avropanın bir çox klublarında da istifadə olunur və "Qarabağ” bu sistemdən istifadə etməklə Azərbaycanda bir ilki reallaşdıracaq.
