"Qarabağ"ın keçmiş futbolçusu Samuel Armenteros Yunanıstan "Panatinaikos"unun maraq dairəsinə düşüb.
Sportnet.az-ın sport24.gr-yə istinadən məlumatına görə, "yaşıllar" Birləşmiş Ərəb Əmirliklərinin "Əl-Ayn" komandasına keçən hücumçu Markus Berqin əvəzinə 4 potensial namizədi gözdən keçirirlər.
Bunlardan biri hazırda Hollandiya "Herakles"ində çıxış edən Armenterosdur. 27 yaşlı forvard ötən mövsüm Erediviziyada 33 oyuna 22 qol vurub və ilk dəfə İsveç millisinə dəvət alıb. Ona İtaliya klublarından biri də maraq göstərir. Lakin "Panatinaikos" təcrübəli forvardı izləməkdə davam edir.
Digər namizədlər isə Danimarka "Brondbü"sünün finlandiyalı hücumçusu Teemu Pukki, Portuqaliya "Sportinq"inin hollandiyalı forvardı Lük Kastaynyos və İtaliya "Latsio"sunun serbiyalı qolçusu Filip Corceviçdir.
Afina təmsilçisi problemin icarə yolu ilə yox, birdəfəlik transfer etməklə həllini istəyir. Bunun üçün 500 min avrodan çox büdcə ayrılıb.
Qeyd edək ki, "Panatinaikos" "Qəbələ"nin Avropa Liqasının III təsnifat mərhələsində rəqibidir. İki komanda arasında Yunanıstan paytaxtında keçirilmiş ilk görüş meydan sahiblərinin qələbəsi ilə yekunlaşıb - 1:0. Cavab görüşü avqustun 3-də Bakıda olacaq. Samuel Armenteros "Qarabağ"da 2015-2016 mövsümündə çıxış edib. O, 23 oyuna 7 qol vurub.
