Futbol üzrə Azərbaycan Premyer Liqasında bu gün III turun son 2 oyunu keçirilib. Sportnet.az-ın məlumatına görə, meydana 3 şərikli lider və "Sumqayıt" komandası çıxıb.
"Gənclik şəhəri" təmsilçisini ilk pillədə qərarlaşmış "Zirə" qəbul edib. Görüş meydan sahiblərinin 3:1 hesablı qələbəsi ilə yekunlaşıb. Bütün qollar ikinci hissədə vurulub. "Zirə"dən gənc Vüsal İsgəndərli "dubl" etməsi ilə diqqət çəkib.
Turun son oyunu isə artıq prinsipial rəqiblərə çevrilmiş "Qarabağ" və "Qəbələ" komandaları arasında olub. "Azərsun Arena"da keçirilmiş matça meydan sahibləri Çempionlar Liqasının qrup mərhələsinə tarixi vəsiqədən doğan yüksək motivasiya ilə çıxıblar. Danimarka "Kopenhagen"i ilə "pley-off" matçındakı start heyətindən 5 oyunçu bu dəfə oynamasa da, qələbə yenə "Qarabağ"ın olub - 2:1. Bu qarşılaşmada da hər 3 qol ikinci hissədə vurulub.
Beləliklə, "Zirə" və "Qarabağ" hərəyə 9 xalla şərikli liderliklərini davam etdiriblər. 6 xala malik "Qəbələ" isə 3-cüdür.
Azərbaycan Premyer Liqası, III tur
26 avqust (şənbə)
18:00. "Zirə” – "Sumqayıt” - 3:1
Qol: Riçard Qadze, 52. Vüsal İsgəndərli, 61; 78 - Jozef Bum, 88-öz qapısına
Hakimlər: Ömər Paşayev, Namiq Hüseynov, Cavanşir Yusifov, Rəvan Həmzəzadə
AFFA nümayəndəsi: Abas Hüseynov
Hakim-inspektor: Məhəmməd Məmmədov
Zirə İdman Kompleksinin stadionu
20:30. "Qarabağ” – "Qəbələ” - 2:1
Qol: Mahir Mədətov, 62. Markos Madera, 73 - Steven Monroz, 68
Hakimlər: Fariz Yusifov, Yaşar Abbasov, Vaqif Musayev, Rauf Cabbarov
AFFA nümayəndəsi: Şaiq Həmidov
Hakim-inspektor: Əli Hüseynov
"Azersun Arena”
Hər iki oyun "CBC Sport” telekanalı vasitəsilə canlı yayımlanıb.
Qeyd edək ki, ilk oyun günündə "İnter" "Səbail"i 1:0 hesabı ilə yenib, "Neftçi" - "Kəpəz" matçında qalib müəyyənləşməyib - 0:0.
