"Qarabağ” klubu yay transfer pəncərəsinin son günündə üçüncü, ümumilikdə isə yeddinci transferini edib.
Sportnet.az-ın klubun rəsmi saytına istinadən məlumatına görə, Norveç millisinin üzvü Tarik Elyunussi Yunanıstan "Olimpiakos”undan cari mövsümün sonunadək icarəyə götürülüb.
Əsasən yarımmüdafiənin sol cinahında oynayan Elyunussi sağ cinah və hücum arxası mövqelərində də çıxış edir. 28 yaşlı futbolçu peşəkar karyerasına Norveçin "Fredrikştad” klubunda başlayıb, daha sonra Hollandiyanın "Hereneven”, Norveçin "Lillström” və "Rusenburq”, Almaniyanın "Hoffenhaym” kimi klublarında çıxış edib. Ötən ilin yayında isə futbolçu "Olimpiakos” klubuna transfer olunub.
Norveç milli komandasıyla 43 oyuna çıxan Tarik Elyunussi 9 qolla yadda qalıb.
