"Qarabağ" azarkeşləri İtaliya "Roma"sı ilə Çempionlar Liqasının qrup mərhələsinin II tur matçına aldıqları vauçerləri bu gündən biletlərlə dəyişdirməyə başlaya bilərlər. Sportnet.az-ın məlumatına görə, bu barədə Ağdam klubunun müraciətində qeyd olunur.
Rəsmi açıqlamada bildirilir ki, iTicketAZ-ın çatdırılma xidmətini sifariş edən azarkeşlərlə tezliklə əlaqə saxlanılacaq və çatdırılma həyata keçiriləcək. Çatdırılma xidmətini sifariş etməyənlər satış məntəqələrinə yaxınlaşaraq vauçeri biletə dəyişə bilər. Həmin məntəqələr "Gənclik mall” və "28 mall"da, "Park Bulvar"da (Qarabağ FK Fanshop), M.Rəsulzadə 3 (Azərb.k/t yaxınlığı) Bül-bül prospekti, Nizami küç.(Nizami k/t yaxınlığı), Üzeyir Hacıbəyov küç.69x (Hökümət evinin arxası), Asan Xidmət mərkəzləri, Heydər Əliyev Sarayının kassasında yerləşir. Vauçer biletə dəyişilən zaman, vauçerdə qeyd olunan şəxsiyyət vəsiqəsi mütləq təqdim olunmalıdır.
Bir şəxsiyyət vəsiqəsi ilə yalnız bir bilet əldə etmək mümkündür. Stadiona daxil olarkən, şəxsiyyət vəsiqəsi və bileti də götürmək lazımdır.
Qeyd edək ki, sentyabrın 27-də Bakı Olimpiya Stadionunda keçiriləcək "Qarabağ" - "Roma" matçı saat 20:00-da başlanacaq.
