"Çətin oyun oldu. Bunu gözləyirdik. "İnter”lə oyunlarımız həmişə gərgin keçir. Bu matça yaxşı hazırlaşmışdıq. Rəqibin standart vəziyyətlərdə yaxşı oynadığını bilirdik. Buna xüsusi hazırlaşmışdıq. Lakin təəssüf ki, qolu məhz standart vəziyyətdən buraxdıq. Rəqib azlıqda qaldıqdan sonra üstünlüyü ələ aldıq. Qol da vurduq. Ancaq hesabı xeyrimizə dəyişə bilmədik. Rəqibin də bir neçə fürsəti oldu. "İnter” çempionatda ən yaxşı müdafiə olunan komandalardandır".
Sportnet.az-ın məlumatına görə, bunu "Zirə"nin baş məşqçisi Ayxan Abbasov Azərbaycan Premyer Liqasının VI turunda evdə "İnter"lə 1:1 hesablı heç-heçə etdikləri oyundan sonra deyib. Daha sonra gənc mütəxəssis jurnalistlərin suallarını cavablandırıb...
- Videotəkrarda qol epizodunda topun qapı xəttini keçdiyi aydın görünürdü...
- Həmin epizodun təkrarına baxmamışam.
- Həftə ərzində bir neçə gün Belarusda oldunuz. Düşünmürsünüz ki, xal itkisində bunun da rolu oldu?
- Belə düşünmürəm. Bizim komandada güclü nizam-intizam var. Mənim olmamağımın ciddi təsiri yoxdur. Cəmi 2 məşqdə olmamışam. Sadəcə, birinci pillədə qərarlaşdıqdan sonra bəzi oyunçularda özünə əminlik yaranıb. İlk hissədə meydanda istədiyim oyunu, mübarizəni görmədim. Fikrimcə, buna səbəb də məhz bəzi oyunçularda rahatlıq yaranmasıdır. Lakin ikinci hissədə oyunçularımda istədiyim əzmkarlığı gördüm. Məğlub olsaydıq belə, bu oyundan razı qalacaqdım. Elə məhz ikinci hissədəki oyuna görə futbolçularıma təşəkkür etdim.
- Nicat Qurbanova bir qədər sərt reaksiya göstərdiniz. Onu cəza gözləyir?
- Hər bir klubun intizam kodeksi var. Ona uyğun addım atırıq. Düzdür, rəqib onu zədələmişdi. Lakin heç bir futbolçuya ixtiyar verməmişik ki, hakimlə mübahisə etsin.
