"Kəpəz" komandasının baş məşqçisi Yunis Hüseynovun Sportnet.az-a müsahibəsi
- Qış hazırlıqlarına nə zaman başlayacaqsınız?
- 4-5 yanvarda futbolçular tibbi müayinədən keçəcəklər. Yanvarın 7-də bir məşqimiz olacaq. Ertəsi gündən isə Bakıda bir həftəlik təlim-məşq toplanışımız start götürəcək.
- Hazırlıq prosesinə neçə futbolçu ilə başlamağı düşünürsünüz?
- Hardasa 16-17 futbolçu ilə.
- Heyətə yeni futbolçular cəlb olunub?
- Yenilərin hamısını bilirsiniz: Samir Zərgərov, Murad Səttarlı, Roman Hüseynov və Tərzin Cahangirov. Cahangirovla yanvarın 6-da müqavilə bağlayacağıq. Müqavilə 1 illik nəzərdə tutulub.
- Bakıdakı toplanış zamanı neçə yoxlama oyunu nəzərdə tutmusunuz?
- 2 oyunumuz olacaq. Yanvarın 15-də rəqibimiz I Divizionda çıxış edən "Sabah" komandası olacaq. Digər görüşü isə yanvarın 13-də keçirməyi nəzərdə tutmuşuq. Hazırda rəqib qismində bir neçə komanda ilə danışıqlar aparırıq. Məşqlərimiz və oyunlar Dövlət Bədən Tərbiyəsi və İdman Akademiyasının stadionunda olacaq.
- Ötən gün daha 8 futbolçu ilə yollarınızı ayırdınız. Bu, nə ilə əlaqədar idi?
- Nə iləsə əlaqəli deyil. Sadəcə, oyun sistemimə uyğun gəlmədikləri üçün onlarla yollarımızı ayırdıq. Onlardan yalnız Məhəmməd Qurbanov komandanı öz istəyi ilə tərk edib. Qurbanovla komandaya qayıtmaq istəmədiyi üçün vidalaşdıq.
- Kərim Diniyev qol.az-a müsahibəsində bildirib ki, "Kəpəz"dən göndəriləcəyini gözləmirmiş...
- Futbolda hər şey olur, gözləyib-gözləməmək kimi bir şey yoxdur. Bayaq qeyd etdiyim kimi, istədiyim taktikaya, oyun sisteminə uyğun gəlmədikləri üçün bu uşaqlarla yollarımızı ayırdıq.
- Axı Kərim Diniyev daim əsas heyətdə oynayan, komandaya xeyir verən futbolçulardan olub...
- Bəli, oynayıb. Mən də ona gələcək karyerasında uğurlar arzulayıram.
- Əvvəlki baş məşqçi Şahin Diniyevin oğlu olması səbəbindən qərarınız müəyyən söz-söhbətlərə yol açıb...
- Nə söz-söhbət ola bilər ki?! Şahin müəllimlə indi də yaxınam, indi də dostam. Salam-əleykimiz var. Bunun ona heç bir aidiyyatı yoxdur. Mənə elə gəlir ki, jurnalistlərin bu formada qabartmaları düzgün deyil. Kərimin göndərilməsinin Şahin müəllimin oğlu olması ilə qətiyyən əlaqəsi yoxdur. Şahin Diniyevlə indi də münasibətdəyəm, əvvəllər də belə olub və yenə olacaq. O da peşəkar mütəxəssisdir və belə şeyləri düzgün analiz edir. Burada başqa bir məsələ yoxdur.
- Kərim Diniyev "Yəqin "Kəpəz"i bu vəziyyətə salanlar bizik, ona görə kənarlaşdırılmışıq" deyib...
- Mən onun dedikləri ilə tanış deyiləm. Kərim Diniyevə gələcək işlərində uğurlar arzulayıram. Mərifətli, tərbiyəli uşaqdır, yaxşı futbolçudur. Sadəcə, oyun sistemimə uyğun gəlmədikləri üçün 8 futbolçu ilə yollarımızı ayırmışıq. Başqa bir şey yoxdur.
- Qış fasiləsindən sonra hansı oyun sisteminə üstünlük verəcəksiniz?
- Bunu gələcəkdə görərik. İndidək hansı taktika ilə oynayacağımızı demək düzgün çıxmaz. Bu, futbolçu seçimimizdən asılıdır. Oyunumuzu bu seçimə əsasən quracağıq.
- Əvvəllər "Kəpəz" daha çox əks-hücumlara üstünlük verirdi...
- Baxacağıq. Elə oyun olacaq ki, hücum futbolu sərgiləyəcəyik, eləsi də olacaq ki, müdafiədən oynayacağıq (gülür - red.). Bunu hər matça aid eləmək mümkün deyil.
