Azərbaycan millisinin yeni baş məşqçisi Qurban Qurbanovun açıqladığı ilk siyahıda cəmi 6 klubun 24 oyunçusuna yer verib. Sportnet.az təlim-məşq toplanışı və Moldova ilə yoldaşlıq görüşü üçün tərtib olunan siyahını təhlil edərkən, bir sıra maraqlı məqamlar üzə çıxarıb.
Əslində 6 klubdan 24 futbolçu hər kluba orta hesabla 4 futbolçunun düşdüyü anlamına gəlir. Lakin futbolçuların bölgüsünə nəzər yetirsək, dəvətlilərdən yalnız bir futbolçu - Pavel Paşayevin legioner olduğunu görərik. Qalan oyunçular isə Azərbaycan Premyer Liqasındakı 8 klubdan 5-ni təmsil edir. "Zirə", "Kəpəz" və "Səbail"dən heç bir futbolçu dəvət etməyən Qurbanov "Qarabağ"dan 11, "Neftçi"dən 6, "Qəbələ"dən 3, "Sumqayıt"dan 2, "Keşlə"dən isə 1 oyunçu çağırıb.
Dəvətlilər arasında yeni adlar da var. Bunlar qapıçı Rəşad Əzizli, müdafiəçi Bəhlul Mustafazadə və Anton Krivotsyukdur. Şahrudin Məhəmmədəliyevlə Abbas Hüseynov isə Robert Prosineçkinin dönəmində Qətərlə yoldaşlıq görüşünə dəvət alsa da, meydana çıxmayıb. Mərkəz müdafiəçisi mövqeyinə son zamanlar "Sumqayıt"da sabit çıxışı ilə seçilən Bəxtiyar Həsənalızadə yox, daim kobud səhvlərə yol verən Elvin Yunuszadənin çağırılması birmənalı qarşılana bilməz. Eyni zamanda "Sumqayıt"ın hücumçusu Amil Yunanova dəvət göndərilməməsini də vurğulamaq olar.
Qurban Qurbanov ümumilikdə 3 qapıçı, 9 müdafiəçi, 9 yarımmüdafiəçi və 3 hücumçunu heyətə cəlb edir:
Qapıçılar: Kamran Ağayev ("Keşlə"), Şahrudin Məhəmmədəliyev ("Qarabağ"), Rəşad Əzizli ("Neftçi")
Müdafiəçilər: Maksim Medvedev ("Qarabağ"), Elvin Yunuszadə ("Qarabağ"), Abbas Hüseynov ("Qarabağ"), Ruslan Abışov ("Neftçi"), Məhəmməd Mirzəbəyov ("Neftçi"), Anton Krivotsyuk ("Neftçi"), Təmkin Xəlilzadə ("Qəbələ"), Bəhlul Mustafazadə ("Sumqayıt"), Pavel Paşayev ("Oleksandriya", Ukrayna)
Yarımmüdafiəçilər: Əfran İsmayılov ("Qarabağ"), Qara Qarayev ("Qarabağ"), Rahid Əmirquliyev ("Qarabağ"), Coşqun Diniyev ("Qarabağ"), Riçard Almeyda ("Qarabağ"), Rəhman Hacıyev ("Neftçi"), Emin Mahmudov ("Neftçi"), Cavid Hüseynov ("Qəbələ"), Cavid İmamverdiyev ("Sumqayıt")
Hücumçular: Mahir Mədətov ("Qarabağ"), Ramil Şeydayev ("Qarabağ"), Ruslan Qurbanov ("Qəbələ")
Qeyd edək ki, təlim-məşq toplanışı yanvarın 27-dən 31-dək davam edəcək. Moldova ilə oyun isə yanvarın 30-da olacaq.
