"Bu təlim-məşq toplanışı məndə müsbət rəy yaratdı".
Sportnet.az xəbər verir ki, bunu Azərbaycanın 16 yaşadək futbolçulardan ibarət milli komandasının baş məşqçisi Azər Məmmədov Bakıdakı toplanışı affa.az-a dəyərləndirərkən deyib. O bildirib ki, hazırlıq prosesi zamanı əsasən texniki-taktiki çalışmalara üstünlük verilib.
3 yoxlama matçı keçirdiklərini deyən Məmmədov daha böyük yaşlı kollektivləri rəqib seçdiklərini diqqətə çadırıb: "Futbolçuların güclü komandalarla qarşılaşmada necə təsir bağışladığını görmək üçün rəqib qismində yaşca daha böyük kollektivləri seçdik. U-17 milli komandamızla yanaşı, 4-5 yaş böyük futbolçulardan qurulmuş "Keşlə” və "Sabah”ın əvəzedici heyəti ilə qarşılaşdıq. Hər üç oyunda məğlub olmağımıza baxmayaraq, futbolçular özlərini yaxşı tərəfdən göstərməyə çalışdılar. Müsbət keyfiyyətlərlə yanaşı, mənfiləri də gördük. Təlim-məşq toplanışlarının sayını artırmağa çalışacağıq. Çünki bu uşaqlarla nə qədər çox bir yerdə olsaq, onlardan nə istədiyimizi daha çox anlayacaqlar”.
Qeyd edək ki, toplanış 10 gün davam edib.
