Azərbaycan millisinin futbolçusu Ramil Şeydayev Rusiya "Krılya Sovetov"unun heyətində növbəti oyununu keçirib.
Sportnet.az xəbər verir ki, 21 yaşlı hücumçu "Axmat"la Rusiya Premyer Liqasının XIV tur matçında 65-ci dəqiqədə meydana daxil olub. O, Alan Çoçiyevi əvəzləyib. Həmin vaxt Samara təmsilçisi Ravanellinin 64-cü dəqiqədə vurduğu qolla 0:1 hesabı ilə geridə olub. Şeydayev oyuna girdikdən 4 dəqiqə sonra Maksim Kanunnikov bərabərlik qolunu vurub. Lakin 81-ci dəqiqədə Oleq İvanov "Axmat"ın qələbə topunun müəllifi olub.
Bu məğlubiyyətdən sonra "Krılya Sovetov" 14 xalla 13-cü pillədə qərarlaşıb. "Axmat" isə 19 xalla 8-cidir.
