Azərbaycan Premyer Liqasında XIX turun daha bir oyunu keçirilib.
Sportnet.az-ın məlumatına görə, lider "Neftçi" debütant "Sabah"ı qəbul edib. "Bakcell Arena"da təşkil olunmuş qarşılaşma meydan sahiblərinin böyük hesablı qələbəsi ilə yekunlaşıb - 3:0.
Hesabı 9-cu dəqiqədə "Neftçi"nin yeni transferi Canluka Sansone açıb. Təkbətəkdən fərqlənən italiyalı hücumçu Premyer Liqada ilk qolunu vurub. 24-cü dəqiqədə kapitan Emin Mahmudov qüvvətli zərbə ilə topu "9-luğ"a göndərib. Oyunda son nöqtəni 79-cu dəqiqədə Baqali Dabo qoyub. Fransalı hücumçu qollarının sayını 9-a çatdıraraq, bombardirlər siyahısında liderliyini möhkəmlədib.
Flaqman oyunu azlıqda başa vurub. 84-cü dəqiqədə Məhəmməd Mirzəbəyov ikinci sarı vərəqəni alaraq, meydandan kənarlaşdırılıb.
Bu qələbə sayəsində xallarını 41-ə çatdıran "Neftçi" ən azı bir günlük vahid liderə çevrilib. 21 xala malik "Sabah" isə 5-ci pillədə qalıb.
Qeyd edək ki, turun açılış oyununda "Səbail" "Sumqayıt"la qolsuz heç-heçə edib - 0:0. Tura sabah keçiriləcək "Zirə" - "Qəbələ" və "Keşlə" - "Qarabağ" matçları ilə yekun vurulacaq.
---------------------
Azərbaycan Premyer Liqasında XIX tura start verilib.
Sportnet.az-ın məlumatına görə, açılış oyununda "Səbail" "Sumqayıt"ı qəbul edib. "Bayıl Arena"da keçirilmiş görüşdə hesab açılmayıb. Matç "Səbail" üçün erkən əvəzləmə ilə başlayıb. 1-ci dəqiqədə Vüqar Bəybalayev top uğrunda hava mübarizəsi zamanı Adil Nağıyevin dirsək zərbəsinə tuş gəlib. Nəticədə ağır zədələnən Bəybalayev meydanı xərəkdə tərk edib.
Görüşü Azərbaycan millisinin yeni baş məşqçisi Nikola Yurçeviç köməkçisi Arif Əsədovla birgə izləyib.
Qolsuz heç-heçə nəticəsində xallarını 31-ə çatdıran "Səbail" 3-cü pillədə qalıb. "Sumqayıt" isə qış fasiləsindən sonra ilk dəfə xal qazanmağı bacarıb. 16 xala malik "gənclik şəhəri" təmsilçisi "Keşlə" ilə bərabərləşsə də, şəxsi oyunlardakı üstün olmaması səbəbindən sonuncu pillədə qalıb.
Qeyd edək ki, turun növbəti oyunu "Neftçi" və "Sabah" arasında keçiriləcək. "Bakcell Arena"da təşkil olunacaq qarşılaşma saat 18:30-da başlanacaq. Tura martın 3-də "Zirə" - "Qəbələ" və "Keşlə" - "Qarabağ" oyunları ilə yekun vurulacaq.
-----------------------------------
Futbol üzrə Azərbaycan Premyer Liqasında XIX tura start veriləcək.
Sportnet.az xəbər verir ki, ilk oyun günündə iki qarşılaşma təşkil olunacaq.
Turun açılış oyununda “Səbail” “Bayıl Arena”da “Sumqayıt”ı qəbul edib. Görüş qolsuz bərabərliklə sona çatıb - 0:0.
Günün digər matçında lider “Neftçi” debütant “Sabah”ın müqavimətini qırmağa çalışacaq. Son oyunda “Səbail”ə məğlub olan flaqman çempionluq üçün iddiasını davam etdirmək istəyir. Komandalar yalnız cari mövsümdə qarşılaşıblar. “Neftçi” hər iki görüşdə də rəqibini məğlub edib.
Qeyd edək ki, tura sabah keçiriləcək "Zirə" - "Qəbələ" və "Keşlə" - "Qarabağ" matçları ilə yekun vurulacaq.
2 mart (şənbə)
16:00. “Səbail” – “Sumqayıt” - 0:0
Hakimlər: Səbuhi Bayramov, Yaşar Abbasov, Müslüm Əliyev, Ziya Nəsirov
Hakim-inspektor: Ceyhun Haşımov
AFFA nümayəndəsi: Eldəniz Musayev
“Bayıl Arena”
18:30. “Neftçi” – “Sabah” - 3:0
Qollar: Canluka Sansone, 9. Emin Mahmudov, 24. Baqali Dabo, 79
Qırmızı vərəqə: Məhəmməd Mirzəbəyov, 84 ("Neftçi")
Hakimlər: Vüqar Həsənli, Mübariz Haşımov, Cəmil Quliyev, Nail Nağıyev
Hakim-inspektor: Munis Abdullayev
AFFA nümayəndəsi: Şaiq Həmidov
“Bakcell Arena”
