Gürcüstanın paytaxtı Tbilisidə "Dinamo" və "Qəbələ" komandaları arasında UEFA Avropa Liqasının II təsnifat mərhələsinin cavab görüşü keçirilib.
Sportnet.az-ın matça ezam olunmuş əməkdaşının verdiyi məlumata görə, Boris Payçadze adına "Dinamo" stadionunda təşkil olunmuş qarşılaşma meydan sahiblərinin qələbəsi ilə yekunlaşıb - 3:0. İlk iki qolu 68-ci və 88-ci dəqiqələrdə "göy-ağlar"ın kapitanı Levan Şengeliya, sonuncusunu isə uzatma dəqiqələrində Abdel Medyub vurub.
55 min tamaşaçı tutumuna malik arenada oyuna maraq gözləniləndən xeyli aşağı olub. 7 minədək tamaşaçının izlədiyi görüş "Dinamo"nun üstünlüyü şəraitində keçib. Matçın əvvəllərində "Qəbələ" 0:2 hesablı ev məğlubiyyətinin əvəzini çıxmaq üçün hücum cəhdləri etsə də, faydasız olub. Meydan sahibləri isə tədricən üstünlüyü ələ almağa başlayıb. Əsasən uzaqdan zərbələrə üstünlük verən paytaxt təmsilçisinin bəzi epizodlarda fərqlənməsinə "qırmızı-qaralar"ın qapıçısı və kapitanı Anar Nəzirov mane olub.
40-cı dəqiqədə isə "Qəbələ" məcburi dəyişikliyə əl atmalı olub. İvitsa Zuriç komanda yoldaşı Rasim Ramaldanovla toqquşma nəticəsində zədələnərək, meydanı xərəkdə, daha sonra ambulansla tərk etməli olub. Meydana isə Sadiq Quliyev daxil olub.
Qalan bölümdə daha çox müdafiə olunan qonaqların müqaviməti 68-ci dəqiqədə qırılıb. Nəzirov Şengeliyanın zərbəsinə əngəl ola bilməyib. Qalan bölümdə də "Qəbələ" heç nə ilə yadda qalmayıb. Əvəzində 88-ci dəqiqədə Şengeliya daha bir qol vurub. Oyunda son nöqtəni isə uzatma dəqiqələrində Abdel Medyub qoyub.
Beləliklə, "Qəbələ" evdə olduğu kimi, səfərdə də uduzaraq, mübarizəni dayandırıb.
---------------------------------
"Neftçi" komandası UEFA Avropa Liqasında III təsnifat mərhələsinə vəsiqə qazanıb.
Sportnet.az xəbər verir ki, paytaxt təmsilçisi buna II raundun Bakıda baş tutan cavab oyununda Rusiya "Arsenal"nı 3:0 hesabı ilə məğlub etməklə nail olub. "Ağ-qaralar" 49-cu dəqiqədə Rauf Əliyevin vurduğu qolla önə keçiblər. 89-cu dəqiqədə Dario Frederiko penaltini dəqiq yerinə yetirib. Uzatma dəqiqələrində isə Mamadu Mboc son nöqtəni qoyub.
Beləliklə, Tulada baş tutan ilk qarşılaşmada da rəqibini 1:0 hesabı ilə üstələyən bakılılar yola davam ediblər.
Qeyd edək ki, "Neftçi" III təsnifat mərhələsində İsrailin "Bney Yehuda" komandası ilə qarşılaşacaq. İlk matç avqustun 8-də Bakıda, cavab görüşü isə 15-də Təl Əvivdə olacaq.
-------------------------------
Bu gün "Qəbələ" və "Neftçi" komandaları UEFA Avropa Liqasının II təsnifat mərhələsində cavab oyununu keçirəcəklər.
Sportnet.az-ın məlumatına görə, "qırmızı-qaralar" Gürcüstanda "Dinamo" ilə üz-üzə gələcək. Sənan Qurbanovun baş məşqçisi olduğu kollektiv evdəki 0:2 hesablı məğlubiyyətin əvəzini Tbilisidə çıxmağa çalışacaq.
Əyalət təmsilçisi Qəbələ şəhər stadionunda 41-ci dəqiqədə Levan Katulya, 87-ci dəqiqədə Arfanq Daffenin qolları ilə uduzub. Ölkə kubokunun sahibi "Dinamo"nu 2:0 hesabı ilə üstələyə bilsə, görüşdə əlavə vaxt oynanılacaq. Qarşılaşma Finlandiyalı hakimlərə tapşırılıb.
Flaqman isə "Bakcell Arena"da Rusiya "Arsenal"ını qəbul edəcək. Tulada rəqibini 1:0 hesabı ilə məğlub edən paytaxt təmsilçisi cavab matçında sərfəli nəticə qazanmağa cəhd göstərəcək. Səfərdə Dario Frederikonun 45-ci dəqiqədə vurduğu qol "Neftçi"yə qələbə qazandırıb. Görüşü Maltadan olan hakimlər briqadası idarə edəcək.
UEFA Avropa Liqası
II təsnifat mərhələsi, cavab oyunları
21:00. “Dinamo” (Tbilisi, Gürcüstan) - “Qəbələ” (Azərbaycan) - 3:0
Qollar: Levan Şengeliya, 68; 88. Kvame Karikari, 90+3
Baş hakim: Petri Vilyanen
Baş hakimin köməkçiləri: Riku Vihreavuori, Mika Lamppu
Dördüncü hakim: Dennis Antamo (hamısı Finlandiya)
Hakim-inspektor: Yens Larsen (Danimarka)
UEFA nümayəndəsi: Sergey Lisnik (Moldava)
Tbilisi. Boris Payçadze adına stadion
İlk oyun – 2:0
21:00. "Neftçi" (Azərbaycan) - "Arsenal" (Rusiya) - 3:0
Qollar: Rauf Əliyev, 49. Dario Frederiko, 89 (penalti ilə). Mamadu Mboc, 90+3
Baş hakim: Alan Mario Sant
Baş hakimin köməkçiləri: Ona Edvard Spiteri, Roberto Vella
Dördüncü hakim: Malkolm Spiteri (hamısı Malta)
Hakim-inspektor: Mika Peltola (Finlandiya)
UEFA nümayəndəsi: Kuanış Kanapyanov (Qazaxıstan)
"Bakcell Arena"
İlk oyun – 1:0
