Bu gün Azərbaycan Premyer Liqasında II dövrənin ilk tur matçında görüşəcək "Qəbələ" və "Qarabağ" komandaları ümumilikdə 55-ci dəfə üz-üzə gələcəklər.
Sportnet.az-ın məlumatına görə, indiyədək 54 dəfə qarşılaşan rəqiblər Premyer Liqada 45, Azərbaycan kubokunda 9 duelə çıxıblar. Bu oyunlarda 12 qələbə qazanan “Qəbələ” 17 heç-heçə edib. 25 dəfə isə Ağdam klubu qalib gəlib. 118 qolun vurulduğu matçlarda 47 dəfə rəqib qapısına yol tapan "qırmızı-qaralar" 71 top buraxıblar.
Premyer Liqa görüşlərində isə 10 dəfə üç xala sevinən “Qəbələ” 12 dəfə bərabərliklə kifayətlənib. 23 dəfə qələbə qazanan “Qarabağ” top fərqində də öndədir – 63:40.
27-ci dəfə ağdamlılarla evdə oynayacaq “Qəbələ” doğma divarlar arasında 8 dəfə qalib gəlib. 8 heç-heçə edən komanda 10 dəfə uduzub. Bu görüşlərdə 56 qol qeydə alınıb. Qonaqlar 29, meydan sahibləri 27 dəfə fərqlənib.
Qeyd edək ki, Qəbələ şəhər stadionunda keçiriləcək matç saat 17:00-da başlayacaq.
