Cennaro Qattuzo İtaliyanın "Napoli" komandasına baş məşqçi təyin olunub.
Sportnet.az-ın məlumatına görə, 41 yaşlı mütəxəssis Karlo Ançelottini əvəzləyib. Yeni baş məşqçi ilə müqavilənin detalları açıqlanmayıb. Daha əvvəl onun 1,5 illik müqaviləyə imza atacağı bildirilib. Klub Çempionlar Liqasına vəsiqə qazansa, sözləşmə daha bir il uzadılacaq.
Qattuzonun son klubu 2017 - 2019-cu illərdə çalışdığı "Milan" olub. O, 5-ci yeri tutmuş komandanı Çempionlar Liqasına çıxara bilmədiyi üçün istefaya göndərilib.
Qeyd edək ki, "Napoli" hazırda İtaliya A Seriyasında 21 xalla 7-ci pillədədir. Neapol təmsilçisi E qrupunda 12 xal toplayaraq, 2-ci yerin sahibi kimi Çempionlar Liqasının 1/8 final mərhələsinə yüksəlib.
