UEFA Çempionlar Liqasında 1/4 finalın daha iki oyunu başa çatıb.
Sportnet.az-ın məlumatına görə, hər iki qarşılaşmada qonaq komandalar qalib gəliblər.
Fransa PSJ-si Almaniyada "Bavariya"nı 3:2 hesabı ilə məğlub edib. Matça fəal başlayan Paris klubu 3-cü dəqiqədə Kilian Mbappenin vurduğu erkən qolla hesabı açıb. 28-ci dəqiqədə meydan sahibləri 2-ci topu qapılarında görüblər. Bu dəfə Markinyos fərqlənib. 37-ci dəqiqədə Erik Şupo-Motinq fərqi azaldıb və komandalar fasiləyə bu hesabla yollanıblar. İkinci yarının əvvəlində "Bavariya" tarazlığı bərpa edib. 51-ci dəqiqədə Tomas Müller rəqibi cəzalandırıb. Lakin 68-ci dəqiqədə dubl edən Mbappe PSJ-ni yenidən önə keçirib. Bu, eyni zamanda matçın yekun nəticəsi olub.
Gecənin digər oyununda isə İngiltərənin "Çelsi" klubu pandemiya səbəbindən İspaniyadakı "Ramon Sançes Pisxuan" stadionunda baş tutan qarşılaşmada Portuqaliya "Portu"suna 2:0 hesabı ilə qalib gəlib. Qolları 32-ci dəqiqədə Meyson Maunt, 85-ci dəqiqədə isə Bencamin Çilvell vurublar.
-------------------
Bu gün UEFA Çempionlar Liqasının 1/4 final mərhələsində daha 2 oyun keçiriləcək.
Sportnet.az-ın məlumatına görə, gecənin ən maraqlı görüşü Almaniyada turnirin son finalçıları "Bavariya" ilə Fransa PSJ-si arasında olacaq.
Qarşılaşma öncəsi hər iki komandanın heyətində ciddi itkilər var. Münhen təmsilçisində Robert Levandovski, Duqlas Kosta, Mark Roka, Korenten Tolisso zədə, Serj Qnabri isə koronavirusa yoluxduğu üçün meydana çıxa bilməyəcək. Qonaqlarda Leven Kürzava və Mauro İkardi zədəli, Leandro Paredes cəzalıdır. Marko Verratti və Alessandro Florentsidə isə koronavirus aşkarlanıb. Danilonun isə oynayıb-oynamayacağı bilinmir.
Gecənin digər oyunu İspaniyada olacaq. 1/8 finalda İtaliya "Yuventus"unu mübarizədən kənarlaşdıran Portuqaliya "Portu"su pandemiya ilə bağlı səyahət məhdudiyyətlərinə görə İngiltərənin "Çelsi" klubunu "Ramon Sançes Pisxuan" stadionunda qəbul edəcək. Nominal meydan sahiblərinin heyətində Məhəmməd Mbaye zədəli, Serjiu Oliveyra və Mehdi Taremi cəzalı olduqları üçün oynamayacaqlar. London təmsilçisində yeganə itki zədəli Nqolo Kantenin yoxluğudur. Kristian Pulişiçin meydana çıxıb-çıxmayacağı isə sual altındadır.
Bu komandalar arasında cavab qarşılaşmaları aprelin 14-də gerçəkləşəcək.
Çempionlar Liqası, 1/4 final
İlk oyunlar
23:00. "Bavariya" (Almaniya) - PSJ (Fransa) - 2:3
Qollar: Erik Şupo-Motinq, 37, Tomas Müller, 60 - Kilian Mbappe, 3; 68, Markinyos, 28
23:00. "Portu" (Portuqaliya) - "Çelsi" (İngiltərə) - 0:2
Qollar: Meyson Maunt, 32, Bencamin Çilvell, 85
Qeyd edək ki, ilk oyun günündə keçirilən matçlarda İngiltərə klublarından "Liverpul" İspaniyada "Real Madrid"ə 1:3 hesabı ilə uduzub, "Mançester Siti" isə evdə Almaniyanın "Borussiya" (Dortmund) klubuna qalib gəlib - 2:1.
