Azərbaycanın bədii gimnastika üzrə qrup hərəkətlərindən ibarət komandası Portuqaliyanın Portiman şəhərindəki "Challenge" seriyalı Dünya Kubokunda 3 medal qazanıb.
Sportnet.az-ın federasiyanın rəsmi saytına istinadən verdiyi məlumata görə, Siyana Vasilyeva, Aliyə Paşayeva, Diana Doman, Ayşən Bayramova və Zeynəb Hümmətovadan ibarət "5-lik" ilk olaraq, çoxnövçülükdə fərqlənib. Onlar iki kompozisiyanın nəticəsinə əsasən bürünc medal əldə ediblər.
Bu komanda iki hərəkət üzrə ayrı-ayrı finallara da vəsiqəni təmin edib. Həlledici mərhələdə "5-liy"in halqalarla nümayiş etdirdiyi kompozisiya gümüş medalla mükafatlandırılıb.
Top və iplərlə final proqramında isə onlar qızıl medala yiyələnərək, Azərbaycan himnini Portuqaliyada səsləndiriblər.
