İdman Araşdırmalar Mərkəzinin təşkilatçılığı, "Kolizey İnşaat"ın baş sponsorluğu və Sportnet.az-ın informasiya dəstəyi ilə Çempionlar Liqası ilə bağlı keçirilən "Çempion" yarışmasında 1/4 final mərhələsinin ilk görüşlərindən daha 2-si bu gecə baş tutacaq. Sportnet.az-ın məlumatına görə, bu gün keçiriləcək qarşılaşmaların 4 iştirakçısından 3-ü jurnalistdir.
Portuqaliya "Portu"sunu təmsil edən ANS-çi Vüsal Süleymanov Almaniya "Bavariya"sının "nümayəndəsi" Futbol Veteranları İttifaqının sədri Oqtay Abdullayevlə üz-üzə gələcək. Hər iki şəxs "Bavariya"nın 1 top fərqi ilə qələbəsini proqnozlaşdırıb. Amma media işçisi Almaniyanın ən titullu klubunun daha çox top vuracağı qənaətindədir.
Fransa PSJ-sinin təmsilçisi, ATV-nin əməkdaşı Sənan Şəfizadə İspaniya "Barselona"sının "Qəbələ" İK qəzetində çalışan "nümayəndə"si Mehman Süleymanovla üz-üzə gələcək. Hər iki şəxs meydan sahiblərinin qələbə qazana bilməyəcəkləri qənaətinə gəlib. Bununla belə, Süleymanov Şəfizadədən fərqli olaraq, PSJ-nin heç-heçəyə nail olacağını proqnozlaşdırıb.
Vüsal Süleymanov (ANS): "Portu" (Portuqaliya) - "Bavariya" (Almaniya) - 1:2
Oqtay Abdullayev (Futbol Veteranları İttifaqının sədri): "Portu" (Portuqaliya) - "Bavariya" (Almaniya) - 0:1
Sənan Şəfizadə (ATV): PSJ (Fransa) - "Barselona" (İspaniya) - 1:2
Mehman Süleymanov ("Qəbələ" İK): PSJ (Fransa) - "Barselona" (İspaniya) - 1:1
