Bu gün Sportnet.az idman portalının rəsmən fəaliyyətə başlamasından bir il ötür. 2014-cü il mayın 13-də Sportnet.az İdman Araşdırmalar Mərkəzinin (İAM) layihəsi kimi fəaliyyətə başlayıb.
Sayt qısa müddətdə özünəməxsus rubrikaları, xəbərləri, araşdırma və təhlilləri ilə idman ictimaiyyəti arasında tanınmağa başlayıb. Sportnet.az İAM-ın həyata keçirdiyi layihələrə informasiya dəstəyi dəstəyi də verərək, daha bir fərqli fəaliyyət istiqamətini ortaya qoyub. Bunun əyani nümunəsi kimi DÇ-2014-lə bağlı təşkil olunan və jurnalistlər, futbol funksionerləri, veteranlar, futbolçular, hakimlərin iştirakı ilə baş tutmuş "FUTPROQNOZ" yarışmasını göstərmək olar. Eyni zamanda şou-biznes nümayəndələrinin idmanla bağlı fikirlərini yer aldığı SPORTŞOU rubrikası da qeyd edilməlidir. Ən böyük fərqli cəhətimiz isə "Futboldan başqa digər növlərdən xəbərlər oxunmur" kimi fikirlərin əksinə, məhz digər idman növlərindən xəbərlərin Sportnet.az-da maraqla izlənilməsi olub.
Ötən müddətdə Sportnet.az-ın tanınması, geniş oxucu kütləsi toplaması üçün bir çox jurnalistin danılmaz xidmətləri olub. Ən böyük xidmət isə sayta dəyər verən sadiq oxuculara məxsusdur.
Belə bir əlamətdar gündə ilk növbədə, dəyərli oxucularımızı təbrik edirik. Bundan sonra da onların sayta marağını saxlamaq üçün bütün gücümüzlə çalışacağıq.
