Gürcüstanın idman naziri Şalva Qoqoladzenin Sportnet.az-ın Tbilisidə keçirilən cüdo üzrə Avropa çempionatına ezam olunmuş əməkdaşına müsahibəsi
- Avropa çempionatının təşkilatçılığı barədə nə deyə bilərsiniz?
- Çox gözəl və maraqlı gün alındı. Bir gün ərzində iki cüdoçumuz Avropa çempionu oldu. Eyni zamanda açılış mərasimində iştirak etdik. Bununla da Gürcüstanda yüksək səviyyədə yarışlar keçirə biləcəyimizi bir daha sübut etdik. Fərqi yoxdur: Bu, güləş də, cüdo da, digər idman növü də ola bilər. Xoş haldır ki, bütün idman nailiyyətlərimiz çox yaxşıdır.
- Laşa Şavdatuaşvili və Hidayət Heydərov arasındakı final görüşünü də izlədiniz. Qarşılaşmanı necə dəyərləndirirsiniz?
- - Hər iki cüdoçu çox yaxşı hazırlaşmışdılar. Belə yarışlarda finala çıxan idmançıların yaxşı çıxış etmələri çətindir. Bu gün Laşa Şavdatuaşvilinin bir qədər daha hazırlıqlı olması göründü. Lakin sizin idmançınız da formada idi. Bu yarış bir daha göstərdi ki, Gürcüstanın cüdo üzrə milli komandası dünya səviyyəsində aparıcı kollektivlərdən biridir. Komanda yüksək səviyyəli cüdoçulardan formalaşıb və demək olar ki, heyətin 100 faizi böyük nailiyyətləri olan idmançılardan ibarətdir. Komandanın liderlərindən olan Şavdatuaşvili hazırda da yaxşı formada çıxış edir və beynəlxalq yarışlarda uğurlu nəticələr əldə edir. Ümumilikdə, həm Gürcüstan, həm də Azərbaycan cüdo məktəbləri güclü ənənələrə malikdir və gələcəkdə də beynəlxalq arenada böyük uğurlar qazanacaqları gözlənilir.
- Gürcüstan və Azərbaycan arasındakı idman sahəsində münasibətlərə dair fikirləriniz necədir?
- Gürcüstan və Azərbaycan arasında münasibətlər yüksək səviyyədədir. Bu yaxınlarda Azərbaycan Prezidenti İlham Əliyev Gürcüstana rəsmi səfərə gəlmişdi. Azərbaycanın gənclər və idman naziri Fərid Qayıbovla tanışam. Azərbaycana bir neçə rəsmi səfər etmişəm, orada həmkarım olan nazirlə görüşmüşəm. Münasibətlərimiz müxtəlif istiqamətlər üzrə davam edir. Gürcüstan və Azərbaycan uzun müddətdir dostluq edir. Bu, idman sahəsinə cavabdeh şəxslər olaraq, bizim üçün də çox xoşdur. Qarşılıqlı təlim-məşq toplanışları və yarışlarda tez-tez iştirak edirik. Münasibətlərimiz çox yaxşıdır və müxtəlif sahələrdə əməkdaşlığa əsaslanır. İşgüzar müzakirələr, texniki əməkdaşlıq və hər iki ölkədə keçirilən tədbirlər bu əlaqələrin inkişafına töhfə verir. İdarəetməmiz çərçivəsində tədbirlər həm Azərbaycanda, həm də Gürcüstanda təşkil olunur və qarşılıqlı iştirak təmin edilir.
- Bu il cüdo üzrə dünya çempionatı Bakıda keçiriləcək...
- Azərbaycanın infrastrukturu və imkanları ölkədə beynəlxalq yarışların keçirilməsinə əlverişli şərait yaradır. Xüsusilə idman sahəsində əldə olunan uğurlar və yaradılan şərait Avropa çempionatlarının yüksək səviyyədə təşkilinə imkan verir. Azərbaycan artıq dəfələrlə beynəlxalq idman yarışlarına ev sahibliyi edib, bu sahədə böyük təcrübəyə malikdir. Bu baxımdan, Avropa çempionatlarının ölkənizdə keçirilməsi həm real, həm də məqsədəuyğun hesab olunur. Hesab edirik ki, dünya çempionatı Azərbaycanda yüksək səviyyədə təşkil olunacaq və bütün aspektlər, o cümlədən təşkilati və hüquqi məsələlər yüksək səviyyədə təmin ediləcək.
- Yaxın vaxtlarda Azərbaycana səfəriniz nəzərdə tutulubmu?
- Cüdo üzrə dünya çempionatına mütləq gələcəyəm.
Elşən MƏMMƏDOV, Tbilisi
