Beynəlxalq Şahmat Federasiyasının (FİDE) prezidenti Kirsan İlümjinov vəzifəsini tərk edib. Sportnet.az-ın qurumun rəsmi saytına istinadən məlumatına görə, İlümjinov bu barədə FİDE Prezident Şurasının Yunanıstanın paytaxtı Afinada keçirilmiş iclasında açıqlama verib.
Onun səlahiyyətləri FİDE-nin vitse-prezidenti və Yunanıstanın Şahmat Federasiyasının rəhbəri Georgios Makropoulosa həvalə olunub.
Qeyd edək ki, ABŞ-ın Xəzinə Nazirliyi Suriyada Bəşşar Əsəd rejiminə maliyyə yardımı göstərən, terrorçu İŞİD qruplaşmasından neft alınmasına vasitəçilik edən 4 nəfərə və 6 şirkətə qarşı sanksiya tətbiq edib və onların adları "qara siyahı"ya daxil edilib. Rusiyanın Kalmıkiya Respublikasının başçısı, FİDE-nin prezidenti Kirsan İlümjinov da sanksiyaya məruz qalan şəxslər arasındadır. Sanksiyaya məruz qalan şəxslər və şirkətlərin ABŞ-dakı bütün bank hesabları dondurulub. Həmin şəxs və şirkətlərin ABŞ-da ticarət fəaliyyəti qadağan olunub.
