"Neftçi" ilə Avropa Liqasının III təsnifat mərhələsinin cavab görüşü öncəsi Gürcüstan "Çixura"sının baş məşqçisi Samson Pruidze mətbuat konfransı keçirib. Sportnet.az-ın məlumatına görə, təcrübəli mütəxəssis əvvəlcə ehtiyat oyunçular skamyasının qısa olmasından şikayətlənib.
O bildirib ki, bəzi futbolçuların kiçik zədələri narahatlıq doğurur. Giqa Beçvayanın ayağındakı zədənin hələ tam sağalmadığını deyən baş məşqçi futbolçunun son məşqdə də iştirak etmədiyini dilə gətirib. Bununla belə, Pruidze yaxşı oyun göstərərək, azarkeşləri sevindirmək istədiklərini söyləyib: "Biz bu ruhda meydana çıxacağıq. Heç bir böyük dəyişiklik etmək fikrində deyilik. Hazırda futbolçuların oyun ərzində 10-15 km qaçmağa qadiirdilər. Oyunumuzu rəqibin çıxışından asılı olaraq, hücumda və əks-hücumda quracağıq".
"Çixura"nın baş məşqçisi "Neftçi"nin oyununu da analiz etdiklərini bildirib. Onun sözlərinə görə, flaqman ya 3, ya da 4 müdafiəçidən yararlanır: "Biz bu sxemlərə qarşı necə oynamağın gərəkliyi üzərində işləmişik. Komandam gücü, ehtirası, oyun sisteminə sadiqliyi və mütəşəkkilliyi ilə fərqlənir. Məhz bu sistem Türkiyə "Bursaspor"u ilə əvvəlki mərhələ oyunlarında bizə uğur gətirdi. "Neftçi"ni də bu oyun üslubu ilə yenməyə ümidliyik. Bundan başqa "Neftçi"nin çox yaxşı hücumçu potensialı var. Araz Abdullayev, Culius Vobay və Flavinyodan biri matçın taleyini həll edə bilər. Eyni zamanda, rəqib çox yaxşı sol cinah müdafiəçisi - Bruno Bertuççiyə malikdir. Əsas məqsədimiz topu itirməməkdir. Çünki bu halda biz çox pis vəziyyətdə qalırıq. Oyunun tempini artırmaq üçün gücümüz yoxdur. Oyunçularım əllərindən gələnin maksimumunu edirlər. "Neftçi" qədər pulumuz olmasa da, belə komandaya qarşı oynamaq kimi əlavə stimulumuz var".
Pruidze "Neftçi"dəki həmkarı Böyükağa Hacıyevin "Cavab görüşündə şou göstərəcəyik" açıqlamasına da münasibət bildirib: "Baxarıq görək, "Neftçi" necə şou göstərir? Rəqib komandanın necə oynadığını onun baş məşqçisinə deməzlər. Biz öz uğurumuz üçün oynayırıq"
Qeyd edək ki, bu gün Tiflisdəki Mixail Mesxi adına stadionda keçiriləcək "Çixura" - "Neftçi" matçı Bakı vaxtı ilə saat 22:00-da başlanacaq. Bu komandalar arasındakı ilk görüşdə hesab açılmayıb - 0:0.
