“Böyüklərin əllərindən öpürük, onlar da bizə pul verirlər” - SORĞU

Qurban bayramı İslam aləmində ən müqəddəs bayramlardan biridir. Bütün müsəlman aləmində hər il hicri təqvimi ilə Zilhiccə ayının 10-cu günündən başlayır və adətən üç gün davam edir. Mərasimlərdə qoyun, qoç, inək, dana və ya dəvə kəsilir. Kəsilmiş qurban əsasən kasıb və imkansızlar arasında bölüşdürülür. Pay bölgüsü bərabər aparılır, qurban kəsən özü də pay götürür.

Müqəddəs bayram biz azərbaycanlılar üçün də xüsusi, dəyərli önəm daşıyır.

Sportnet.az "Qurban bayramını necə keçirəcəksiniz? Bayramın hansı adətini yerinə yetirəcəksiniz?" sualı ilə futbol ictimaiyyətinə üz tutdu.

Cəmşid Məhərrəmov ("Bakı”nın futbolçusu) : "Qurban bayramını İslam adət-ənənəsinə uyğun keçirəcəyəm. İnşallah, tədarük görmüşük, qurban kəsəcəyik. Sizin vasitənizlə də bütün Azərbaycan xalqını Qurban bayramı münasibəti ilə təbrik edirəm! Arzu budur ki, torpaqlarımız işğaldan azad olsun, belə bayramları Qarabağda qeyd edək”.

Ağasəlim Mircavadov (Mütəxəssis) : "Hər il öz ailəm ilə birlikdə keçirirəm. Hər bayram qurban kəsirik. İslam adətinə əsasən, 7 qonşuya pay veririk. Hər il bizdə belə olub. Mən gözümü açandan mərhum ata-anamdan belə görmüşəm. Bilirik, qohum-qonşuda kimin imkanı var və ya yoxdur”.

Fərhad Vəliyev ("Qarabağ”ın futbolçusu) : "Hər il olduğu kimi, ailəmlə, yaxınlarımla birgə qeyd edəcəyik. Yaxınlarıma hədiyyə alıb, bayramlarını təbrik edəcəm. Qurban kəsəcəyini qabaqcadan demək, dilə gətirmək yaxşı deyil. Kimin imkanı varsa, kəsib, ehtiyacı olanlara paylasın, savabı böyükdür. İnşallah, biz də savab iş görməyə çalışacağıq”.

Leyla Solmaz (Qızlardan ibarət milli komandanın futbolçusu): "Dinə çox yaxın olmasam da, bu bayramı sevirəm. Ailəmlə qeyd edirik, evimizdə yeməklər bişirilir. Böyüklərin əllərindən öpürük, onlar da bizə pul verirlər”.

Orxan Məmmədov (Hakim): "Çalışacağam ki, vaxtımın çoxunu ibadətə həsr edim. Elə indicə gedirəm qurbanlıq almağa. İnşallah, yaxınlarıma və ehtiyacı olanlara paylayacağam. Allah cəmi ölənlərimizə rəhmət eləsin. Dünyasını dəyişənləri də ziyarətə gedəcəyəm”.

Nurlan Novruzov ("Bakı”nın futbolçusu) : "Qurban bayramında hər il qurban kəsib, 7 evə paylayırıq. Bu bayram müsəlmanlar üçün əsas bayramlardan hesab olunur. Mən də çox sevirəm. Dostlar, qohum-əqrabalar bir yerə yığışır. Bundan gözəl nə ola bilər ki!”.

Röya KƏRİMLİ