Azərbaycan milli komandasının Antalya toplanışı üçün heyəti açıqlanıb. Sportnet.az-ın məlumatına görə, Anton Krivotçuk adı Azərbaycan futbol ictimaiyyətinə tanış deyil.
Bu ilin yanvarında 17 yaşlardan ibarət milli komandanın Türkiyədə keçirilən toplanışına da dəvət alan Krivotçuk hazırda heç bir klubda forma geyinmir. Sonuncu klubu Ukraynanın "Zirka"SI olan 17 yaşlı futbolçunun milliyə dəvət olunmasını AFFA-nın İctimaiyyətlə Ələqələr Departamentinin rəhbəri Mikayıl Nərimanoğlu açıqlamasında belə izah edib: "O, əslən ukraynalı olsa da, Azərbaycan pasportuna malikdir. Həmin futbolçu qış toplanışında U-17-nin heyətində idi. Bu birbaşa olaraq məşqçilər korpusunun seçimidir. Futbolçu haqda qərarı məşqçilər verir".
Sözügedən futbolçunun hazırda klubsuz olduğunu qeyd edən M.Nərimanoğlu milliyə cəlb olunacağı təqdirdə Azərbaycan klublarının birində oynaması fikrinə isə bu cürü münasibət bildirib: "AFFA futbolçu transferi ilə məşğul olmur. Məşqçilər onu milliyə cəlb edə bilər, amma futbolçunun hər hansı bir kluba keçməsi bizdən asılı deyil. Bu məsələni klublardan soruşsanız, daha yaxşı olar. Biz istəyərik ki, millinin üzvləri yaxşı klublarda oynasın". (Report.az)
