Ukraynanın "Dnepr" klubu bir oyunu azarkeşsiz keçirmə cəzasına məhkum ediləcək. Sportnet.az-ın məlumatına görə, buna "Dnepr" fanatlarının Avropa Liqasında İtaliya "Napoli"si ilə yarımfinal mərhələsinin cavab görüşündən sonra Kiyevdəki "Olimpiyski" stadionunda çaxnaşma törətmələri səbəb olub.
Ukrayna Futbol Federasiyası İcraiyyə Komitəsinin üzvü Artyom Frankov bildirib ki, UEFA qərarını ən yaxın müddətdə açıqlayacaq. Təhlükəsizlik və Stadionlar üzrə Komitənin operativ məlumatlarına əsasən, "Dnepr" daha bir oyunluq şərti cəza alıb. Kluba 70 min avro cərimə də kəsilib".
Qeyd edək ki, Kiyevdəki cavab görüşündə "Napoli" üzərində 1:0 hesablı qələbə qazanan Ukrayna təmsilçisi iki oyunun ümumi yekununda finala adlayıb. Mayın 27-də Polşanın paytaxtı Varşavadakı Milli Stadionda keçiriləcək həlledici qarşılaşmada rəqib İspaniya "Sevilya"sı olacaq.
