Voleybolçu qadınlardan ibarət Azərbaycan milli komandası bu gün Avropa çempionatının 3-cü təsnifat mərhələsində ilk görüşünü keçirib. Sportnet.az-ın məlumatına görə, rəqib Slovakiya yığması olub.
Bakıdakı "Azəryolservis" İdman Mərkəzində təşkil olunmuş qarşılaşma meydan sahiblərinin qələbəsi ilə yekunlaşıb. Qonaqlar hər üç setdə ciddi müqavimət göstərsələr də, Azərbaycan yığmasının beynəlxalq oyun təcrübəsi öz sözünü deyib. İlk setdə 25:22, ikincisində 25:18 hesabı ilə üstün olan Aleksandr Çervyakovun komandası üçüncü setdə geridə olmasına rəğmən, sonluğa doğru istəyinə çatıb - 25:23.
Azərbaycan yığması oyuna itki ilə çıxıb. Natalya Məmmədova qolundakı ağrıların davam etməsi üzündən milliyə çağırılmayıb. Əvəzində analıq məzuniyyətindən qayıdan Valeriya Korotenko sonadək meydanda olub.
Qeyd edək ki, cavab görüşü mayın 30-da Slovakiyanın Levitse şəhərindəki İdman Sarayında baş tutacaq. İki oyunun nəticəsində üstün olacaq komanda sentyabrın 26-dan oktyabrın 4-dək Hollandiya və Belçikada təşkil olunacaq Avropa çempionatının final mərhələsinə yüksələcək.
