Bu gün Sportnet.az saytı üçün əlamətdar gündür. İdman portalımız növbəti ad gününü - 2 yaşını qeyd edir. 2014-cü il dünya çempionatı ərəfəsində - elə mayın 14-də rəsmən fəaliyyətə başlayan Sportnet.az-ın budəfəki ad günü növbəti məsul turnir - Fransadakı Avropa çempionatının startına az qalmışa təsadüf edir.
Azərbaycanda idman saytlarının bol olduğu bir vaxtda tanınmaq, ayaq üstə durmaq, rəqabətə davam gətirmək heç də asan deyil. Bunun üçün ilk növbədə, işgüzarlıq tələb olunur ki, bizlərin də qarşısında duran əsas vəzifələrdən biri budur. Məhz işgüzarlıq nəticəsində oxucuların rəğbətini qazanmağa çalışırıq. Təvazökarlıqdan uzaq olsa da, məhdud büdcə ilə idman mətbuatında özünəməxus yer tutmağa nail olduğumuzu deyə bilərik. Sanki Sportnet.az Azərbaycanın "İnter" klubudur, məhdud büdcə ilə istədiyinə çata bilir.
Təbii ki, hər bir sayt üçün operativlik, tanınmaq da əsas şərtlərdəndir. Sevindirici haldır ki, cari mövsümün ilk yarısında "İnter" - "Qarabağ" oyununda (0:2) böyük müzakirə obyektivinə çevrilən vurulmayan penalti epizodu ilə bağlı saytda yerləşdirdiyimiz video dünya mətbuatında yayıldı. Bunu uğurumuz kimi dəyərləndirmək olar. Xatırladaq ki, "Qarabağ"ın baş məşqçisi Qurban Qurbanov həmin epizodda penaltinin olmadığına görə o vaxt komandasında oynayan Elvin Məmmədovun topu kənara vurmasına göstəriş verdi. Qurbanovun bu addımı təkcə Azərbaycanda yox, onun hüdudlarından kənarda da alqışalayiq sayıldı.
Məlum olduğu kimi, Sportnet.az İdman Araşdırmalar Mərkəzinin layihəsidir. Bu qurumun 2016-cı ildə keçirdiyi ilk layihəsinin informasiya dəstəkçisi idik. Həmin tədbir martın 4-də Azərbaycan Voleybol Federasiyasının idman zalında jurnalistlərlə "Azəryol" voleybol klubunun rəhbərliyinin iştirakı ilə keçirilən mini-turnir idi. Yarış 5 mart - Bədən Tərbiyəsi və İdman günü, 8 mart - Beynəlxalq Qadınlar gününə həsr olundu. Avropa Voleybol Konfederasiyasının Kubokunda yarımfinaladək irəliləyən "Azəryol”un Rusiyanın "Dinamo" (Krasnodar) klubu ilə oyunlarından öncə jurnalistlərlə görüşü təşkil olunması məqsədəuyğun sayıldı. Media nümayəndələri klubun rəhbərliyi və voleybolçuları ilə yaxından tanış olaraq, onlara Krasnodar səfəri öncəsi mənəvi dəstək verdilər.
Saytımız heç 2 yaşı tamam olmamış AFFA-nın Media Komitəsinin üzvlüyünə qəbul olundu. Üstəlik, aprel - iyun aralığında maliyyələşdirilmək üçün bu quruma təqdim edilən, qalib gələn layihələrdən biri də Sportnet.az-ın idi. Bu, "Olimpiada: Azərbaycan üçün "idman ölkəsi" imicini təsdiqləmək imkanı" mövzusunda işlənəcək 3 aylıq layihədir.
Əlbəttə, qazanılan nailiyyətlərlə kifayətlənmək olmaz və qarşıda görüləsi işlər çoxdur. Bu il idman turnirləri sarıdan zəngindir. Qarşıdan Fransada futbol üzrə Avropa çempionatı, Bakıda "Formula-1" yarışı və Ümumdünya Şahmat Olimpiadası, Rio-de-Janeyro Yay Olimpiya Oyunları kimi mötəbər yarışlar gəlir. Çalışacağıq ki, bu və digər yarışlarla bağlı xəbərləri oxucularımıza operativ şəkildə çatdıraq, sizləri maraqlı müsahibələr, statistik, analitik yazılarla tanış edək. Saytımızın izləyicilərinin diqqəti bizə böyük motivasiya, əlavə güc verir və ikiqat enerji ilə çalışmağa sövq edir. Axı Sportnet.az sizlərin saytıdır, sizlərə xidmət edir...
Belə xoş gün münasibətilə hazırda Sportnet.az-da çalışan, əməkdaşlıq edən və indiyədək saytımızın uğurları üçün çalışmış bütün həmkarlarımıza bir daha təşəkkürümüzü bildirir, onları və sadiq oxucularımızı təbrik edirik...
