"Heyətə açıqlandığı gün - avqustun 29-da səhər saatlarında baxdım".
Bunu Sportnet.az-a müsahibəsində hazırda "Sumqayıt"da çıxış edən futbolçu Rüstəm Əhmədzadə Azərbaycan millisinin İslandiya və Ukrayna yığmalarına qarşı 2026-cı il dünya çempionatının seçmə qrup oyunlarına çağırılmamasını şərh edərkən deyib.
25 yaşlı hücumçu bildirib ki, baş məşqçi Fernandu Santuşdan dəvət gözləyib: "Yenidən milliyə düşmək istəyirdim. Lakin özüm də başa düşürəm ki, bir müddət oynamamışam, pis təsir bağışlamışam. Buna görə də indi daha çox işləməyim, özümü daha yaxşı tərəfdən göstərməyim lazımdır. O zaman, düşünürəm ki, məni də çağırarlar".
Onun fikrincə, Santuş siyahını Azərbaycan Premyer Liqası başlamamışdan əvvəl hazırlayıb: "Ola bilər. Çünki bunadək baş məşqçi Fernandu Santuş yay fasiləsində millini iki yoldaşlıq görüşünə çıxarmışdı və futbolçuları həmin vaxt izləyə bilmişdi. Çempionat isə avqustun 15-də başlayıb, hələlik cəmi 3 oyun keçirmişik, baş məşqçinin isə görüb seçmək üçün vaxtı az olub. Lakin növbəti toplanışadək bütün futbolçular iş başında olacaq. Ola bilsin, bu toplanış üçün Santuş kimi çağıracağını öncədən bilirdi və siyahını da buna görə hazırlamışdı. Fikrimcə, gələn toplanış üçün isə hazırda kimin necə çıxış etdiyinə, harada və nə qədər oynadığına daha çox diqqət yetirəcək. Siyahının daha tez hazırlanmasına kifayət qədər vaxt aparan viza məsələsi də səbəb ola bilər. Düşünürəm ki, millidə çalışanlar nə etdiklərini və bu cür incəlikləri bilirlər.
Forvard əslən bağlı olduğu Ukrayna yığmasına qarşı oynamaq istəyini də dilə gətirib: "Əlbəttə, çox istəyirdim ki, Ukrayna yığmasındakı uşaqları da görüm, onlara qarşı da oynayım. Amma eybi yox, onlarla Polşada da üz-üzə gələcəyik. Ola bilsin, həmin vaxt milliyə çağırılacağam".
Əhmədzadə Ukraynada çıxış etdiyi vaxt bu ölkənin millisində oynama variantının olmadığını etiraf edib: Ukraynanın əsas millisinə çağırılma şansım olmayıb. Yeniyetmə ikən Ukraynanın müvafiq yaş qrupundan olan millisində oynamaq istəyim var idi. Lakin çağırmadılar və sonradan Azərbaycan millisindən təklif gəldi. Mən də etiraz etmədim. Hesab etdim ki, bu, yaxşı variantdır. Bu komandada çıxış etdiyim üçün şadam".
Qeyd edək ki, Azərbaycan millisi İslandiya ilə sentyabrın 5-də səfərdə, Ukraynaya qarşı sentyabrın 9-da evdə oynayacaq.
