Türkiyənin "Qalatasaray" klubu İspaniya "Real Madrid"inin futbolçusu Xose Rodrigeslə müqavilə bağlayıb. Sportnet.az-ın məlumatına görə, 20 yaşlı yarımmüdafiəçi 4 illik anlaşmaya imza atıb.
Onun əmək haqqı 800 min avrodan 850 min avroyadək artacaq. "Kral klubu"na isə Rodrigesin çıxış edəcəyi hər 30 rəsmi matç qarşılığında 250 min avro ödəniləcək. Bu ödəniş maksimum 4 dəfə olacaq. Bu halda transfer məbləği 1 milyon avro ola bilər.
"Real Madrid"in 2018-ci ilədək Rodrigesi 10 milyon avroya geri qaytarmaq ixtiyarı var. Gənc yarımmüdafiəçi 30 iyun 2018-ci ilədək başqa kluba satılsa, "kral klubu" transfer haqqının 30 faizini alacaq.
Qeyd edək ki, Xose Rodriges ötən mövsümü icarə əsasında "Deportivo"da keçirib. O, La Liqada 25 oyuna 2 qol və 1 məhsuldar ötürmə ilə yadda qalıb.
