"Qalatasaray"ın yeni baş məşqçisi müəyyənləşib. Sportnet.az-ın məlumatına görə, Almaniyanın məşhur "Bild" nəşri Tomas Şaafın İstanbul klubu ilə ilkin müqavilə imzaladığını yazıb.
55 yaşlı almaniyalı mütəxəssislə anlaşma 2018-ci ilədək nəzərdə tutulub. Müqavilə vaxtından əvvəl pozularsa, təzminat 300 min avro olacaq.
Ötən çempionatda uğursuz çıxış edərək 6-ci yeri tutan "Qalatasaray" Türkiyə yığmasının baş məşqçisi Fatih Terimin "sükanı arxası"na qaytarmağı istəsə də, sonda seçimi almaniyalı mütəxəssisin xeyrinə edib. Şaaf uzun illər "Verder"in baş məşqçisi olması ilə tanınıb. O, Frankfurtun "Ayntraxt" klubunun baş məqşçisi olanda "Neftçi"nin və millimizin qapıçısı Emil Balayevi transfer edib. Şaaf son klubu olan "Hannover"dən apreldə istefaya göndərilib.
