Topaz Premyer Liqasının VIII turunun hazırlıqlarını davam etdirən "Qəbələ” yoxlama oyunu keçirib. Sportnet.az-ın məlumatına görə, Roman Qriqorçukun yetirmələri əvəzedici komandaları ilə qarşılaşıb.
Əsas komanda Qəbələ şəhər stadionundakı matça aşağıdakı heyətlə başlayıb: Dmitri Bezotosnı, Rikardinyo, Ürfan Abbasov, Rafael Santos, Vitali Vernidub, Elvin Camalov, Teo Uiks, Roman Hüseynov, Filip Ozobiç, Asif Məmmədov, Baqali Dabo.
Qriqorçuk matçın gedişində Rəşad Eyyubov, David Pietrzkieviç, Sadiq Quliyev, Tellur Mütəllimov, Murad Musayev, Petar Franyiç, Qismət Alıyev, Rəmil Həsənov, Ehtiram Şahverdiyev və Hacıaqa Hacıyevə də şans verib.
4 qolun vurulduğu ilk 45 dəqiqə əsas komandanın üstünlüyü ilə başa çatıb. Hüseynov, Abbasov və Eyyubovun qollarına əvəzedicilər bir topla cavab verə bilib. Fasilədən sonra daha 4 qol qeydə alınıb. Həsənovla Franyiç hərəyə 1, Qismət isə 2 dəfə əvəzedicilərin qapısına yol tapıb. Beləliklə, əsas və əvəzedici komandaların oyununda birincilər 7:1 hesabı ilə qalib gəlib.
Xatırladaq ki, "Qəbələ” VIII turda "İnter”lə görüşəcək. Əvəzedicilər oktyabrın 14-də, əsas komandalar isə ertəsi gün üz-üzə gələcək.
