Azərbaycanlı FİFA referisi Əliyar Ağayevin idarə edəcəyi avrokubok matçının hakim-inspektor və UEFA nümayəndəsi açıqlanıb. Sportnet.az-ın məlumatına görə, Avropa Liqasının qrup mərhələsinin oktyabrın 20-də baş tutacaq "Konyaspor” (Türkiyə) – "Braqa” (Portuqaliya) oyununa təyinat alan Ağayevin başçılıq etdiyi hakimlər briqadasının işinə tanınmış rusiyalı hakim-inspektor Nikolay Levnikov qiymət verəcək.
60 yaşlı sabiq FİFA referisi Bakıya hakimlərimiz və hakim-ispektorlarımız üçün seminar keçirməyə gəlib. Həmin seminarda Ağayev də iştirak edib. Konyadakı matçın UEFA nümayəndəsi isə ingiltərəli Maykl Epplebi olacaq.
Qeyd edək ki, Ağayevin briqadasında Rza Məmmədov, Zeynal Zeynalov, Mübariz Həşimov, Orxan Məmmədov və Rəhim Həsənov yer alacaq.
