"Neftçi"nin rumıniyalı futbolçusu Katalin Tira klubun tarixində "fərqlənib". Sportnet.az-ın məlumatına görə, Tira "ağ-qaralar"ın heyətində qırmızı vərəqə alan rumıniyalı ilk legioner olub.
O, Azərbaycan Premyer Liqasının IX turunda "Qarabağ"la "Bakcell Arena"dakı oyunda meydana çıxan azarkeşin üzərinə cumaraq yumruq atıb. Nəticədə 22 yaşlı hücumçu meydandan qovulub.
Bunadək Tiranın "Neftçi"də çıxış edən həmyerlilərindən heç biri - nə yarımmüdafiəçilər Leonard Naydinlə Marius Aliuta, nə də hücumçu Adrian Neaqa belə ağır cəzaya məruz qalıb. Onlar nəinki azarkeşi vurub, ümumiyyətlə, qırmızı vərəqə almayıblar. Əksinə, Neaqa daha çox penaltidən fərqlənsə belə, 16 qolla "Neftçi"nin 2009-2010 mövsümündə bombardiri olub. Aliuta 5, Naydin isə 1 dəfə rəqib qapısına yol tapıb. Katalinin da hesabında 1 qol var.
Azərbaycan milli çempionatında cari mövsümədək 34 rumıniyalı legioner çıxış edib. Yəni, Tira yubilyar - 35-ci olub. Rumıniyadan "cığıraçan" isə 2004-cü ildə "Bakı"ya gələrək debüt mövsümündə Azərbaycan Kubokunu qazanan yarımmüdafiəçi Marius Suleapdır.
Katalinin həmyerliləri arasında Azərbaycanda ən çox oynayanı hazırda da milli çempionatımızın iştirakçısı olan Manuel Adrian Skarlatakedir. Təcrübəli müdafiəçi bu mövsümdən "İnter"İn şərəfini qoruyur və Premyer Liqada 100 oyun səddini aşan ilk rumıniyalı futbolçudur. O, "Xəzər Lənkəran"da 4 mövsümdə Azərbaycan çempionatında 95 oyun keçirib. Skarlatake eyni zamanda milli çempionatın ən intizamsız rumıniyalı futbolçusudur. O, Lənkəran klubunda 4 ildə 5 dəfə meydandan qovulub, 28 sarı vərəqə alıb.
Qeyd edək ki, Katalin Tira AFFA İntizam Komitəsi tərəfindən 5 oyunluq cəza və 2400 manat cəriməyə məruz qalıb. "Neftçi" isə məşqlərindən kənarlaşdırdığı Tiranı birdəfəlik qovmağa hazırlaşır.
Mehman SÜLEYMANOV
Yazı AFFA yanında Media Komitəsinin dəstəyi ilə hazırlanıb.
