Azərbaycan milli komandası ilə rəsmi oyuna hazırlıqdan kənarda qalan Şimali İrlandiya millisinin futbolçusu Ceymi Uord zədəsindən danışıb.
Sportnet.az-ın məlumatına görə, 30 yaşlı hücumçu xəsarət aldığı epizodu şərh edib.
İngiltərə çempionatının birinci divizionunda çıxış etdiyi "Barton"un heyətində zədələnən Uord müdafiəyə köməyə getdiyi zamanı problemlə üzləşib: "Topu qovurdum. Müdafiəni bağlamağa getdim. Bir anda zədə aldım. Əvvəlcə elə də çox ağrı hiss etmirdim. Müayinə edildikdən sonra gördük ki, vəziyyətim daha pis imiş. Ümid edirəm ki, 4 həftə sonra normal yeriyə biləcəyəm. Bu, əməliyyatın necə keçməsindən asılıdır. Milli komandanın da həkimləri məni motivasiya edirlər”.
Qeyd edək ki, təcrübəli futbolçu ayağındakı sınıq səbəbiylə DÇ-2018-in seçmə mərhələsi çərçivəsindəki Azərbaycanla oyunu və Xorvatiya ilə yoldaşlıq matçını buraxmalı olacaq.
