Şimali İrlandiya və Azərbaycan milli komandaları arasında keçirilən 2018-ci il dünya çempionatının seçmə qrup matçı yekunlaşıb. Sportnet.az-ın məlumatına görə, millimiz cari seçmə mərhələdə ilk məğlubiyyətini darmadağınla alıb. Meydan sahibləri hər hissədə qapımıza 2 dəfə yol taparaq böyükhesablı məğlubiyyətimizi rəsmiləşdiriblər.
Bununla da rəqib xal sayında Azərbaycana çatıb və turnir cədvəlində 2-ci pilləni əlindən alıb. Çünki britaniyalılar şəxsi oyuna görə artıq bizdən üstündürlər.
---------------------
Şimali İrlandiya və Azərbaycan milli komandaları arasında keçirilən 2018-ci il dünya çempionatının seçmə qrup matçının ilk yarısı başa çatıb.
Sportnet.az-ın Belfastdakı "Windsor Park"da oyunu izləyən əməkdaşının verdiyi məlumata görə, millimiz hesabda geridədir - 0:2.
Qolları 27-ci dəqiqədə Kayl Lafferti, 40-cı dəqiqədə Qaret Makoli vurub. Aramsız yağış altında keçən görüşün əvvəllərində komandamız bir neçə təhlükəli vəziyyət yaratmağa müvəffəq olub. Amma həmin hücumların sonluğu kəsərli alınmayıb.
Əvəzində meydan sahibləri özlərinə xas olan standart vəziyyətləri qolla tamamlamağa müvəffəq olublar. İkinci qoldan sonra bir qədər fəallaşan millimiz hücumlar qurmağa cəhd edib. Amma bu dəfə də bir nəticə hasil olmayıb.
İlk yarının başa çatdığını bildirən fit isə millimiz təhlükəli hücumda olduğu vaxt səsləndirilib.
Birinci hissədə Maksim Medvedev və Kris Brant toqquşaraq, yerdə qalıblar. Hər iki futbolçu oyunu başı sarıqlı halda davam etdirə bilib. 39-cu dəqiqədə isə Emin Mahmudov kobud oyuna görə sarı vərəqə alıb.
Qeyd edək ki, bu görüşədək Azərbaycan millisi C qrupundakı ilk 3 oyununda qol buraxmamışdı. Amma artıq komandamızın qapısında 2 top var.
------------------------------
Bu gün futbol üzrə Azərbaycan milli komandası 2018-ci il dünya çempionatının seçmə mərhələsində növbıti oyununa çıxacaq. Sportnet.az-ın məlumatına görə, Robert Prosineçkinin baş məşqçisi olduğu komanda Belfastda Şimali İrlandiya yığmasının qonağı olacaq. Matç Bakı vaxtilə saat 23:45-də başlayacaq.
Millimiz ilk 3 oyundan sonra 7 xalla qrupda 2-ci yerdə gedir. Şimali İrlanidya yığması isə 4 xalla Azərbaycan millisinin ən yaxın izləyicisidir. Deməli, rəqib qalib gələrsə, xallar bərabərləşəcək, biz qələbə qazansaq, xal fərqini 6-dək artıracağıq. Heç-heçə isə 3 xallıq fərqi saxlayacaq.
Yığmamız Şimali İrlandiya ilə bunadək 4 dəfə görüşüb. Həmin matçlar da dünya çempionatının seçmə mərhələ oyunlarına təsadüf edib. Keçirilən 4 oyunda hər yığma 1 dəfə qalib gəlib, qalan 2 matç isə bərabərliklə nəticələnib.
Dünya çempionatı, seçmə qrup mərhələsi, C qrupu
11 noyabr
23:45. Şimali İrlandiya - Azərbaycan - 4:0
Qollar: Kayl Lafferti, 27, Qaret Makoli, 40, Konor Maklauhlin, 67, Kevin Brant, 83
Baş hakim: Klemen Turpin
Yan xətt hakimləri: Nikolas Danidos, Kiril Qrinqore
Dördüncü hakim: Frank Şneyder (hamısı Fransa)
Belfast. "Windsor Park" stadionu
