2018-ci il dünya çempionatının seçmə qrup mərhələsində Azərbaycan millisi ilə eyni qrupda mübarizə aparan yığma komandalar bu gün yoldaşlıq oyunu keçirəcəklər. "Report"un məlumatına görə, C qrupunun lideri Almaniya səfərdə İtaliya ilə üz-üzə gələcək.
Son oyunda Robert Prosineçkinin rəhbərlik etdiyi komandanı evdə 4:0 hesabı ilə məğlub edən Şimali İrlandiya Xorvatiyanı sınağa çəkəcək. Hər iki qarşılaşma Bakı vaxtı ilə saat 23:45-də başlayacaq.
Çexiya yığmasının rəqibi isə Danimarka olacaq. Bu oyunun start fiti saat 23:30-da səslənəcək.
Qeyd edək ki, 4 oyundan sonra C qrupuna 12 xalla ALmaniya yığması liderlik edir. Aktivində 7 xal olan Şimali İrlandiya və Azərbaycan komandaları müvafiq olaraq 2 və 3-cü pillələri bölüşür. Çexiya yığması 5 xalla 4-cü, Norveç isə 3 xalla 5-ci pillədə qərarlaşıb. Qrup sonuncusu San Marinonun aktivində isə xal yoxdur.
