Azərbaycan Premyer Liqasında çıxış etmiş futbolçu Şəhriyar Xəlilovun ölümünün təfərrüatları məlum olub.
Futbolçunun ilk məşqçisi Tofiq Əliyev Sportnet.az-a açıqlamasında ölümə ürək tutmasının səbəb olduğunu bildirib: "Məndə olan məlumata görə, Şəhriyar gecə yatıb, səhər durmayıb. Biz də uşaq liqasında oyuna gəlmişik. Xəbər verdilər ki, Xəlilov vəfat edib. Şəhriyar Samux rayonunun Zazalı kəndindən idi. Elə oradakı evində ölüb. Şəhriyarın uşaqlıqdan ürəyində problemlər yox idi. Hazırda oyunumuz olduğundan, yas yerinə gedə bilməmişik. Ancaq mütləq Samuxa yollanıb ailəsinə başsağlığı verəcəyik".
Tofiq Əliyev Aqil Əliyevlə birgə Şəhriyarın ilk məşqçisi olduqlarını söyləyib: "Biz 2 saylı Gəncə Uşaq Gənclər İdman Məktəbində məşqçi çalışırıq. Şəhriyarin futbolda ilk müəllimləri mənimlə Aqil Əliyev olub. Xəlilov Gəncə futbol məktəbinin yetirməsi olub. Azərbaycanın 15, 17, 19, 21 yaşlılardan ibarət yığmalarında çıxış edib. Gəncədə internatda oxuyurdu, sonra dərhal "İnter"ə aparıldı. Rasim Kara "Qarabağ"da baş məşqçi işləyəndə onu öz komandasına dəvət etdi. Özü də start heyətində çıxış edirdi. Xəlilov bir sıra klublarımızda - "Turan", "Xəzər Lənkəran", "Qəbələ"də oynayıb. Uzun müddət Premyer Liqada çıxış etdi. Son vaxtlar isə birinci divizionda oynayırdı. Deyəsən, "Bakı" dağılmamışdan öncə onun heyətində çıxış edirdi".
Məşqçi mərhumun futbolçu ailəsindən çıxdığını söyləyib: "Şəhriyarın atası Surxay Xəlilov, qardaşı Abbas Xəlilov da futbolçu olub. Abbas Gəncədə "Tərəqqi"də oynayıb".
Mehman SÜLEYMANOV
