"Hazırda özümü yaxşı hiss edirəm, zədəm də sağalıb. Odur ki, məşqlərə başlamağımda heç bir problem qalmayıb". Sportnet.az-ın məlumatına görə, bunu "Kəpəz"in futbolçusu Şəhriyar Əliyev klub saytına açıqlamasında deyib.
Uzun müddət zədəli olduğundan mövsümün ilk yarısında "Kəpəz”ə az kömək edən müdafiəçi yanvarın 11-dən Bakıda məşqlərə başlayan "sarı-göylər”ə qoşulub. O, hazırlıqla bağlı bunları bildirib: "Zədəmlə bağlı ötən il komandama istənilən qədər yardımçı ola bilmədim. Hər bir futbolçunun arzusu klubunun uğur qazanmasına kömək etmək, buna çalışmaqdır. Amma zədələrdən də qaçmaq olmur. Artıq hər şey geridə qalıb. Oynamadığım müddətdə çəkim artmayıb, əksinə azalıb (gülür). Yavaş-yavaş formamı bərpa etməyə çalışacağam. Arzum tezliklə oyunlara çıxmaqdır".
Futbolçu əsas heyətə dönmək üçün rəqabətə hazır olduğunu söyləyib: "Komandamızda əvəzedilməz oyunçu yoxdur. Mənim mövqeyimdə çıxış edən komanda yoldaşlarım özlərini ən yaxşı tərəfdən göstərməyi bacardılar və yoxluğum hiss olunmadı. Ona görə də düşünürəm ki, ilk "11-liy”ə qayıtmaq heç də asan olmayacaq. Rəqabət aparmalıyam və buna hazıram. Kim güclüdürsə, məşqçilər ona da şans verəcək. Birdə ki, əsas olan kiminsə oynaması deyil, "Kəpəz”in uğur qazanmasıdır. Mehriban heyətimiz var, hamı bir-birinin, bütövlükdə isə klubun uğur qazanmasına çalışır”.
