"Qəbələ" və "İnter"lə uğursuz oyunlarımız olmuşdu. Psixoloji baxımdan bir qədər çətinlik yaranmışdı. Lakin toparlana bildik və "Sumqayıt"la görüşdə inamlı qələbə qazandıq". Bu sözləri Sportnet.az açıqlamasında "Qarabağ" klubunun futbolçusu Bədavi Hüseynov deyib.
"Qarabağ" klubu Azərbaycan Premyer Liqasını XIX turunda səfərdə "Qəbələ"yə (0:2), növbəti həftə evdə "İnter"ə (0:1) uduzduqdan sonra ötən şənbə "Sumqayıt"ı 4 cavabsız qolla üstələdi. 26 yaşlı müdafiəçi bildirib ki, Ağdam klubu çempion titulunu qorumaq üçün son tura qədər mübarizə aparacaq: "Əsas mübarizə qabaqdadır. Çempionluq uğrunda sona qədər gücümüzü ortaya qoyacağıq. Rəqiblərimiz də zəif deyil".
Qeyd edək ki, "Qarabağ" növbəti turda AZAL-ı qəbul edəcək. Martın 14-də keçiriləcək oyun saat 17:00-da başlayacaq.
