"Digər oyunlar kimi bu matçımız da çətin alındı. Ötən tur qələbə qazanmağa yaxın olsaq da, son dəqiqələrdə buraxdığımız qolla 2 xal itirmişdik. Bu il çempionatda qələbə qazana bilmədiyimizdən üzərimizdə təzyiq vardı. Qələbəsiz çətin idi. Ona görə də "Zirə"yə qarşı görüşdə meydana ancaq 3 xal məqsədi ilə çıxmışdıq. Bunu da bacardıq. Bizim üçün əhəmiyyəti böyük olan oyunda qalib gəldik”.
Sportnet.az-ın məlumatına görə, bunu "Kəpəz"in futbolçusu Julien Ebah Gəncə "Zirə"ni 1:0 hesabı ilə yendikləri Azərbaycan Premyer Liqasının XXII tur matçından sonra klubunun saytına açıqlamasında deyib. Kamerunlu hücumçu qolunu yeni doğulan qızına həsr etdiyini bildirib: "Qol vurmağımı normal qəbul edirəm. Fərqlənməyimdə təəccüblü bir şey yoxdu. Hücumçuyam, rəqib qapısına ən yaxın mövqedə oynayıram, odur ki, qol vurmaq mənim işimdi. Düzdü, mənim qolum oyunda yeganə olduğundan qalib gəlməyimiz üçün vacib rol oynadı. Ancaq bu təkcə mənim adıma yazılacaq iş deyil, bütün komandanın əməyidi. Hər matçda fərqlənməyə çalışıram, amma bir müddət idi ki, alınmırdı. Qolumu yeni doğulan qızıma həsr edirəm. Onun şərəfinə qol vurduğum üçün çox xoşbəxtəm”.
Qeyd edək ki, əvvəlki 8 görüşdə 3 xal qazana bilməyən "Kəpəz” 2017-ci ildə ilk qələbəni "Zirə" üzərində əldə edib. Yeganə qolu Julien Ebah vurub.
