"Meydana qalib gəlmək üçün çıxmışdıq. "Qəbələ”nin güclü rəqib olduğunu yaxşı dərk edirdik. Amma istəyimiz qalib gəlmək idi. "Qəbələ”nin heyəti çox güclüdür. İstər əsas heyətdə olanlar, istərsə də ehtiyatda oturanlar hamısı güclü oyunçulardır. Meydanda bütün gücümüzü qoyduq, ancaq bu da nəticə üçün bəs etmədi”. Bunu Sportnet.az-a açıqlamasında "İnter”in müdafiəçisi Slavik Alxasov deyib.
Alxasov komandasının ilk görüşdə uduzmasına baxmayaraq, cavab qarşılaşmasında lazımı nəticə üçün oynayacağını söyləyib: "Qarşıda cavab oyunu var. Düzdür, işimiz çətindir. Amma hələ heç nə bitməyib. Cavab qarşılaşması çox çətin olacaq, finala yüksəlmək şansımız çox azdır”.
Aprelin 2-də Azərbaycan Premyer Liqasının XXIV turu çərçivəsində AZAL-ı qəbul edəcək "İnter” görüşdən qalib ayrılaraq, xal ehtiyatını artırmaq istəyir. Gənc futbolçu "təyyarəçilər”i evə əliboş göndərmək istədiklərini bildirib: "AZAL-a qarşı matç çempionatdakı ən vacib oyunlarımızdan biri olacaq. Çünki biz AZAL-a qalib gəlsək, demək olar ki, üçüncü pilləni təmin etmiş olacağıq. Ona görə də bu görüşdə yalnız qələbəyə oynayacağıq”.
